Ermənistanın XİN rəhbəri Moskvaya gedib - Görüşdə nə müzakirə ediləcək?

 

Mirzoyan Moskvaya səfəri çərçivəsində rusiyalı həmkarı Sergey Lavrovla görüşəcək.

Tərəflər görüş zamanı regional təhlükəsizlik və sabitlik, eləcə də ikitərəfli münasibətlərə dair məsələləri müzakirə edəcəklər.

 

Deputat Zahid Orucun fikrincə, bu görüşdə Brüssel görüşündə müzakirə edilən məsələlər Lavrova məruz ediləcək və Azərbaycanın bu səfər barədə heç bir narahatlığı yoxdur.

 

"Mirzoyan Paşinyanın əsas silahdaşıdır və Brüssel görüşündə baş tutan məxfi danışıqlardan xəbərdar idi. Onun Moskvaya səfəri Ermənistanın yürütdüyü siyasətin bir hissəsidir və təbii ki, bu görüşlər öz qərarlarıdır. Ancaq şabhəsiz ki, bu səfərin iki əsas məqsədi var. Birincisi, Brüssel görüşünün bütün detalları Lavrova çatdırılacaq. Bununla bağlı 2020-ci ildə Xankəndinə gələn və hazırda da kiçik ərazidə sülhməramlı funksiyasını daşıyan Rusiya hərbi qüvvələri fonunda Ermənistan elitasının nə etmək istədiyi və Avropa Birliyinin moderatorluğu ilə keçirilən görüşün necə nəticələndiyi sorğulanacaq. Bu görüşdə növbəti dövr üçün müvafiq dövr tapşırıq və təlimatlar da verilə bilər. Bu və bənzər görüşlərdə nəzərdə tutulan sülh müqaviləsinin hazırlıq prosesi, müqavilə barədə detallar - kimlərin iştirakı, hansı xarici güc mərkəzlərinin nüfuzunun artırılması cəhdləri barədə məsələlərin də müzakirə edilməsi planlaşdırılır. Azərbaycan bu görüşdən narahat olmalı deyil. Ölkəmizin Rusiya ilə əlaqələri yuxarı səviyyədədir və Qərb ölkələri ilə əlaqələri yaxşıdır", - Zahid Oruc qeyd edib.

 

Sonuncu dəfə iyunun 9-da Ermənistanın paytaxtı İrəvanda Rusiya xarici işlər naziri Sergey Lavrov və ermənistanlı həmkarı Ararat Mirzoyan arasında görüş olub. Bu görüşdə də ictimaiyyətə bildirilib ki, nazirlər Azərbaycan və Ermənistan arasında münasibətlərin nizamlanmasına dair mümkün sənədi müzakirə ediblər. Bildirilib ki, eyni zamanda XİN başçıları Qarabağ məsələsi ilə bağlı fikir mübadiləsi aparıblar.