Mətbuat Şurası nədir - "faydalı qurum", ya" PA-nın beşinci təkəri"? - FİKİRLƏRİN toqquşması

21.09.2022 19:22

Azərbaycan Mətbuat Şurası Təşkilat Komitəsi İdarə Heyətinə seçiləcək jurnalistlərin siyahısını bu gün müəyyənləşdirib. Həmin namizədlər arasında kimin İdarə heyətinə üzv olacağı qurumun sentyabrın 24-də keçiriləcək qurultayında bilinəcək. Bu barədə Anews.az-a Mətbuat Şurasının rəhbəri Əflatun Amaşov bildirib.

Həmin siyahıda birinci sırada 525-ci qəzetin baş redaktoru və təsisçisi Rəşad Məçid, ikinci yerdə "İki sahil" qəzetinin baş redaktoru Vüqar Rəhimzadə, üçüncü yerdə isə APA xəbər agentliyinin baş redaktoru və təsisçisi Vüsalə Mahirqızı tutub. Namizədlər arasında Modern media qrupunun rəhbəri Elşad Eyvazlı, Qaynarinfo saytının baş redaktoru Zahir Əzəmət, məşhur telejurnalist və BDU jurnalistika fakültəsinin professoru Qulu Məhərrəmli , həmin fakültənin dekanı Vüqar Zifəroğlu kimi əvvəllər Mətbuat Şurasının idarə heyətində təmsil olunmayan simalar da var.

Mətbuat Şurasının İdarə Heyətinə namizədlər arasında bu qurumda gənclərin təmsilçiliyinin tərəfdarı olan Editor.az saytının baş redaktoru Fərid Şahbazlı da var.

Azərbaycan Mətbuat Şurasının sədri Əflatun Amaşov namizədlərin demokratik yolla müəyyən edildiyini bildirib.

"Ümumilikdə kimlər ki, səs toplayıb, onlar namizəd olaraq seçilir. Ən çox səs toplayanlar isə qurultayda mətbuat şurasının idarə heyətinin üzvləri seçiləcəklər",- Amaşov bildirib.

Mətbuat Şurası 2003-cü il martın 15-də ölkə jurnalistlərinin I qurultayında 180-dək aparıcı kütləvi informasiya vasitəsinin təsisçiliyi ilə yaradılıb. 170-ə yaxın KİV və jurnalist təşkilatını təmsil edən 400-ə yaxın nümayəndənin iştirak etdiyi qurultayda Mətbuat Şurasının rəhbər heyəti seçilib. Həmin il aprelin 24-də ictimaiəsaslarda çalışan bu qurum Ədliyyə Nazirliyində dövlət qeydiyyatına alınıb. Mətbuat Şurasını yaratmaqda məqsəd dövlətlə jurnalistlər arasında körpü yaratmaq olub. Bu qurum öz fəaliyyəti zamanı jurnalistlərinin hüquqlarının müdafiəsini əsas götürərək onların barəsində məhkəmə iddialarının qaldırılmasının qarşısını almalı idi.

Mətbuat Şurasının yaradılması ideyasının daşıyıcılarından sayılan "Yeni Nəsil" Jurnalist Birliyinin sədri Arif Əliyev namizədlər sırasında təmsil olunmaq istəmədiyini bildirib.

"Mən özüm müraciət etdim ki, məni o siyahıya əlavə etməyin. Çünki hesab edirəm ki, şura yarandığı gündən ilkin prinsiplərindən çox uzağa gedib. Hazırkı heyətlə işləmək istəməzdim", - Əliyev vurğulayıb.

Mətbuat şurasının yaradılmasının vaxtilə vacib sayan Turan İnformasiya Agentliyinin rəhbəri Mehman Əliyev isə Mətbuat şurasını "Prezident Administrasiyasının beşinci təkəri" adlandırıb.

"Mətbuat Şurasından etiraz olaraq 2009-cu ildə çıxmışam. Mətbuat şurasındakı namizədlərin hamısı hökumət tərəfindən maliyyələşən, nəzarətdə olan medialardır. Mənə namizədlərin kim olduğu heç maraqlı da deyil. Bu qurumu Prezident Administrasiyasının beşinci təkəri hesab edirəm", - Mehman Əliyev söyləyib.

Qurultayda Mətbuat şurasının İdarə Heyətinə 28 jurnalist namizəddən 14-ü, 18 ictimaiyyət nümayəndəsi olan namizəddən isə 9-u seçiləcək.

Aytac Zeynalova

www.anews.az

Xəbəri bəyəndiniz?

Sosial şəbəkələrdə paylaş