İkinci Qarabağ Müharibəsində şəhid olan sərhədçilərin sayı açıqlanıb

Vətən müharibəsində Dövlət Sərhəd Xidmətinin 47 hərbi qulluqçusu şəhid olub. Bu barədə Dövlət Sərhəd Xidmətinin rəisi general-polkovnik Elçin Quliyev müsahibəsində bildirib.

 

Onun sözlərinə görə müharibə nəticəsində 197 nəfər yaralanıb və ya müxtəlif dərəcəli bədən xəsarətləri alıb. 

Hərbi əməliyyatlar zamanı  12 nəfər Azərbaycan sərhədçisi (onlardan 4 nəfər ölümündən sonra) "Vətən Müharibəsi Qəhrəmanı" adına layiq görülüb, 176 nəfəri müxtəlif ordenlərlə, 5203 nəfəri isə müxtəlif medallarla təltif olunub.

"Şəhid ailələrinə dövlət bayramlarında, şəhidlərin doğum və anım günlərində DSX-nin ali hərbi rütbəli zabitləri tərəfindən onlara baş çəkilməsi, onların məzarlarının mütləq yad edilməsi təcrübəsi formalaşdırılıb, qazilərin müalicəsinə, onlara müharibə veteranı adının, sığorta və digər ödənişlərin alınması üzrə sənədləşmə işlərinin görülməsinə xüsusi diqqət göstərilib, şəhid ailəsi üzvlərinin Dövlət Sərhəd Xidmətində hərbi xidmətə və işə qəbul edilmələrinə, şəhid övladlarının DSX-nin Xüsusi Məktəbinə qəbul olunmalarına tam şərait yaradılıb. Bu günədək 12 nəfər şəhid ailəsi üzvü DSX-yə həqiqi hərbi xidmətə, işə, yaxud təhsil müəssisəsinə qəbul olunub”, - deyə Elçin Quliyev qeyd edib.

 

Hərbi təlimlər zamanı cəhbəyə yaxın ərazilərdə şərti əməliyyatlar baş tutub.

2020-ci il sentyabrın 27-də Azərbaycan Müdafiə Nazirliyi cəbhədə Ermənistan tərəfindən təxribat törədilməsi nəticəsində ölən və yaralıların olduğu barədə bəyanat yayıb. Bundan sonra Azərbaycan tərəfi əks hücum əməliyyatlarına başladığını bildirib.Cəbhədə döyüşlər başlandıqdan sonra Ermənistan tam, Azərbaycan isə qismən hərbi səfərbərlik elan edib. 44 günlük davam edən müharibədə Azərbaycan 2908 şəhid verib. Noyabrın 10-da isə Azərbaycan, Ermənistan və Rusiyanın 3 tərəfli bəyanatı imzalanıb. Bəyanata görə hər iki ölkə hərbi əməliyyatları dayandırıb. 

 

Gülnar Nazimqızı