İcbari Tibbi Sığorta 92 özəl tibb müəssisəsi ilə əməkdaşlıq edir

İcbari Tibbi Sığorta Agentliyi 2022-ci ildə 92 özəl tibb müəssisəsi ilə əməkdaşlıq edib. Bunu İcbari Tibbi Sığorta üzrə Dövlət Agentliyinin  ictimaiyyətlə əlaqələr şöbəsinin müdiri Aynurə Əhmədova icvari tibbi sığorta ilə bağlı təlimdə deyib.


O bildirib ki, TƏBİB-in tabeliyindəki xəstəxanalarda bu tibbi xidmətləri vermək mümkün olmadıqda xəstələr həmin tibb müəssisələrinə müraciət edə bilər. Bunun üçün isə sadəcə həkim göndərişi lazımdır.

 

 

2022-ci ilin yanvar-noyabrında 149 179 vətəndaşa 183 877 göndəriş verilib. Göndəriş alan vətəndaşlar bu dövrdə müqaviləli tibb müəssisələrində 66 860 tibbi xidmətdən yararlanıb. Bu xidmətlərdən 1 597-si uşaqlara, 65 263-ü isə böyüklərə göstərilib. 

 

Sözügedən tibbi xidmətlərdən 21 823-nü oftalmoloji əməliyyatlar, 18 268-ni ürək-damar əməliyyatları, 17 179-nu invaziv radiologiya xidmətləri, 2 702-ni urologiya, 2 443-nü neyrocərrahiyyə, 937-ni travmatologiya, 674-nü ümumi cərrahiyyə, 517-ni lor, 144-nü isə ginekologiya və doğuş üzrə aparılan əməliyyatlar təşkil edib. Digər sahələr üzrə icra olunan əməliyyatların sayı 693-dür. İcra olunan koxlear implantasiya və endoprotezləşdirmə əməliyyatlarının sayı isə müvafiq olaraq 82 və 1 398 olub.

Lida Abbaslı