Artıq “Halal” sözü yazılan məhsulları ala bilməyəcəksiz!

“Belə məhsulları satan ticarət obyekti sahibinə iradnamə veriləcək”.

Aprelin 1-dən etibarən “Halal məhsulların sertifikatlaşdırılma qaydaları” dövlət standartının tətbiqinə artıq başlanacaq. Bu günə qədər proses artıq getdi. Sabahdan etibarən “Halal qida. Ümumi tələblər” dövlət standartına uyğun olaraq sertifikatlaşdırılmayan, lakin üzərində “Halal” sözü yazılan məhsulların istehsalı və satışı qadağan olunur.

ANN.Az Modern.az-a istinadən xəbər verir ki, bunu açıqlamasında Standartlaşdırma, Metrologiya və Patent üzrə Dövlət Komitəsinin mətbuat xidmətinin rəhbəri Fazil Talıblı bildirib.

Onun sözlərinə görə, bu məhsullar bazarda olmamalıdır. Komitənin nəzarət xidməti belə faktları aşkarlayacaqsa, qanunvericiliyə uyğun tədbirlər görüləcək.

“Belə faktlar aşkarlanarsa, marketin sahibinə, ticarət şəbəkəsinə iradnamə veriləcək ki, məhsulu satışdan çıxarsınlar. Bu məhsulların satışının əleyhinə deyilik. Məhsulların həqiqətən də halal məhsul olduğunu sübuta yetirib, təsdiq edib, müvafiq qurum tərəfindən sertifikat aldıqdan sonra satışının tərəfdarıyıq. Bununla bağlı isə konkret olaraq heç bir şirkətə sertifikat verilməyib”.

Qeyd edək ki, “Halal” adı altında məhsul istehsal edən müəssisələrə malların markalanmasındakı “halal” sözünün çıxarılması üçün 1 aprel 2014-cü il tarixinədək vaxt verilib. 1 aprel 2014-cü il tarixindən etibarən AZS 731-2012 standartı əsasında sertifikatlaşdırılmayan, lakin “halal” markalı məhsulu istehsal edən müəssisələr barədə qanunvericiliyin tələblərinə uyğun olaraq Komitə yanında Texniki Tənzimləmə və Standartlaşdırma üzrə Dövlət Nəzarəti Xidməti tərəfindən ciddi tədbirlər görüləcək.

ANN.Az