“Bakını Dubayla müqayisə etməyin”

Bakı şəhərini Dubayla müqayisə etmək düzgün deyil. Bakının tarixi, özünəməxsus siması var. 

Bunu ANN.Az-a Azərbaycan Memarlar İttifaqının sədri Elbay Qasımzadə son illər Bakı şəhərinin ümumi memarlıq panoramında “Dubaylaşma” tendensiyasına münasibət bildirərkən söyləyib. 

E.Qasımzadə vurğulayıb ki, Bakını Birləşmiş Ərəb Əmirliklərinin “göydələnlər” şəhəri Dubaya bənzətmək çəhdləri uğursuzdur. Dubay memarlıq və şəhərsalma tarixi olmayan bir məkandır, səhrada yaradılıb. Dubayın mədəni irsi yoxdur. Burada sosial-demoqrafik inkişaf yeni başlayıb. Bakının isə öz şarmı var, öz mədəniyyəti, öz əhalisi var. 

“Çox qədim tarixi olan Bakının dəqiq yaşı hələ də bilinmir. Belə bir şəhəri Dubaya çevirmək ideyası qeyri-ciddidir” - deyən Memarlar İttifaqının sədri bu tendensiyanın Bakı mühiti üçün təhlükəli olduğunu da söyləyib. 

Qeyd edək ki, son zamanlar bəzi yerli və xarici kütləvi informasiya vasitələrində Bakı şəhərinin Dubaya oxşadılması, eləcə də Xəzər sahilində yeni Dubay salınmasına dair fikirlər ictimaiyyət arasında birmənalı qarşılanmır. Bakıda plansız şəkildə ucaldılan “göydələnlər”in şəhərin təbii amfiteatr quruluşuna xələl gətirməsi narazılıq doğurur. 

Onu da xatırladaq ki, öz tərəqqisinə 20 il öncə qədəm qoyan Dubay şəhərində 2 milyona yaxın əhali yaşayır ki, onun da 80 faizi əcnəbilərdir. 

Elçin Məmmədov 

ANN.Az