Keçmiş arvadını oğurlayan şəxsə cəza verildi

Şəki Ağır Cinayətlər Məhkəməsində İsmayıllıda keçmiş arvadını oğurlamaqda təqsirləndirilən Namiq Yusifovun cinayət işi üzrə məhkəmə iclası başa çatıb.

Məlumata görə, hakim Rafail Əliyevin sədrliyi ilə keçirilən prosesdə hökm oxunub.

Məhkəmənin hökmü ilə N.Yusifov dörd il müddətinə azadlıqdan məhrum edilib.

1992-ci il təvəllüdlü Namiq Yusifov keçmiş həyat yoldaşı Nailə Əsədovanı Abşeron rayonunda tanışının avtomobili ilə zorla qaçıraraq yaşadığı İsmayıllı rayonuna gətirib. O, yolda gələrkən əyləşdiyi maşının qabaq oturacağından çevrilərək arxa oturacaqdakı sabiq həyat yoldaşının sifət nahiyəsindən yumruqla qəsdən üç-dörd dəfə vurub. Bir neçə gündən sonra Namiq qadını geriyə qaytararaq onun Ağsu rayonu ərazisindəki qohumlarına təhvil verib.