AXCP üzvləri saxlanılıb- İDDİA

 

"Əlizamin Salayevi həbsxanada ölümə təhrik edirlər, cəbhəçilər Ədliyyə Nazirliyi qarşısında etiraz edir. Etiraz edənlərdən AXCP Səbail şöbəsinin sədri Ceyhun Novruzov 30, AXCP Suraxanı şöbəsi GK sədri Səhlədar İsgəndərli isə 25 sutka müddətinə inzibati qaydada həbs edilir.

Ağdaş rayonundan AXCP Ali Məclis üzvü Məzahir Rəhimovu rayon polisi bu gün saxlayıb.

 

AXCP Ağdaş rayon şöbəsinin sədri Qorxmaz Əbdürrəhimov gedib polis idarəsinə ki, Məzahir bəydən xəbər bilsin, onun özünü də polisdə saxlayıblar. Sonra da Məzahir bəyi 10 sutka inzibati qaydada həbs, Qorxmaz müəllimi də 100 manat cərimə ediblər" - Partiya sədri  vurğulayıb.

 

Azərbaycan Xalq Cəbhəsi Partiyasının Salyan şöbəsinin sədri Zamin Salayev 64 gündür aclıq aksiyası keçirir.

 

Martın 30-da Qaradağ Rayon Məhkəməsi Zamin Salayevin ev dustaqlığına buraxılması üçün verilmiş vəsatəti təmin etməyib.
 
Ombudsman Aparatının əməkdaşları indiyədək iki dəfə təcridxanada Zamin Salayevlə görüşüb.

Ombudsman Aparatı görüşün nəticəsi olaraq Zamin Salayevə qarşı münasibətlə bağlı Penitensiar Xidmətə və prokurorluğa müraciət edib.

Ona qarşı Cinayət Məcəlləsinin 221.3-cü maddəsi (xuliqanlıq - silahdan və ya silah qismində istifadə olunan əşyalardan istifadə edilməklə zərər çəkmiş şəxsə zor tətbiq olunması) ilə cinayət işi açılıb. İttiham sübut olunarsa fəalı 5 ilədək həbs gözləyir.

Məhkəmə onun apellyasiya şikayətini təmin etməyib.

Daha əvvəl Zamin Salayev 2020-ci il aprelin 20-də CM-in 147.2 (ağır cinayətdə ittiham etməklə böhtan atma) və 148-ci (təhqir) maddələri ilə 2 il 3 ay azadlıqdan məhrum edilib. O, Salyan Rayon Polis İdarəsinin əməkdaşı Həmzə Əzizovun şikayəti əsasında cəzalandırılıb.

Salayev həbsindən bir müddət əvvəl sosial şəbəkələrdə adıçəkilən polis əməkdaşıyla mübahisəsinin videosunu yaymışdı. Həmin videoda cəbhəçi fəal Əzizovu rayonda yaşayan qadına qarşı təcavüzə görə ittiham edib.

Video yayılandan sonra Salayev inzibati qaydada 30 günlük həbs olundu. O, həmin vaxt saxlanılarkən işgəncəyə məruz qaldığını, nəticədə səhhətində ciddi problemlər yarandığını bəyan edib.

Ardından polis əməkdaşı Salyan Rayon Məhkəməsində ona qarşı xüsusi ittiham qaydasında iddia qaldıraraq həbsini tələb edib.
 
Salayev hüquq müdafiəçiləri tərəfindən siyasi məhbus kimi tanınıb.

Aytac Zeynalova