Su ehtiyatlarından səmərəli istifadə üçün Sumqayıt və Abşeron üzrə işçi qrupları yaradılıb

Su ehtiyatlarından səmərəli istifadənin təmin olunması, içməli sudan qeyri-qanuni istifadə hallarının aşkarlanması və aradan qaldırılması, su itkilərinin minimuma endirilməsi, israfçılığın qarşısının alınması və yaranmış debitor borcların ödənilməsi məqsədilə Azərbaycan Dövlət Su Ehtiyatları Agentliyi yerli icra orqanları ilə birgə fəaliyyətin təşkili istiqamətində zəruri tədbirlər həyata keçirir. Bununla bağlı keçirilən görüşdə bu sahədə görülmüş işlər və qarşıda duran vəzifələr müzakirə edilib.

Prezident İlham Əliyevin 2020-ci ildə imzaladığı sərəncama əsasən ölkə ərazisində su ehtiyatlarından səmərəli istifadənin təmin edilməsi, su təsərrüfatının idarə olunmasının təkmilləşdirilməsi və bu sahədə fəaliyyətin əlaqələndirilməsi məqsədilə Komissiya yaradılıb və Tədbirlər Planı təsdiq edilib.

 

Tədbirlər Planında nəzərdə tutulan tətbirlərin icrasını təmin etmək, su itkilərinin, israfçılığın, sudan qanunsuz istifadənin aradan qaldırılması istiqamətində Azərbaycan Dövlət Su Ehtiyatları Agentliyi tərəfindən kompleks tədbirlərin icrasına başlanıb. Bu məqsədlə Bakı şəhəri və rayonlarının, Sumqayıt şəhəri və Abşeron Rayon İcra Hakimiyyətləri ilə birgə fəaliyyətlərin əlaqələndirilməsi nəzərdə tutulub.

 

Bakı şəhərinin rayonları, Sumqayıt şəhəri, Abşeron rayonu və Bağlar massivi üzrə işçi qrupları yaradılıb və fəaliyyətə başlayb. İlkin araşdırmalar göstərir ki, bir sıra sahibkarlıq subyektləri və fərdi evlərin sahibləri sudan qanunsuz və uçotsuz istifadə edir, bunların yolverilməz olduğu onların diqqətinə çatdırılır və maarifləndirmə işləri aparılır.