225 nömrəli məktəbin şagirdi müəllimin qeyri-etik davranışlarına məruz qalıb

Bakıda 225 nömrəli tam orta məktəbin 10-cu sinif şagirdi (müvafiq səbəbdən adı qeyd olunmur) mütəmmadi olaraq məktəbin müəllim və şagird heyyəti tərəfindən ayrıseçkiliyə məruz qalıb. O, bu haqda özü anews.az-a bildirib.
 
O bildirib ki, məktəbin coğrafiya müəlliməsi Sevda İsmayılova ona qarşı sinifdə aşağılayıcı sözlər işlədərək şagirdlərin yanında alçaldıb.
 
"Sevda müəllimə summativ yazarkən sinifə daxil olub "bu, nə saçdır, özünü getdikcə arvada oxşadırsan. Sənə evdə valideynlərin heç nə demir?! Evdən gələndə sənə baxmırlar?! Özünü kişi kimi apar” deyərək məni alçaltmağa başladı. Mən ona deyəndə ki, özüm bilərəm, bu mənim öz həyatımdır, o üstümə qışqırdı. Sonra mənə sinifdəki oğlanları nümunə göstərək onlar kimi ol dedi”, - şagird bildirib. 
 
Məsələ ilə bağlı 225 nömrəli tam orta məktəbin direktoru ilə əlaqə saxladıq. Direktor bildirib ki, bu məsələ artıq iki aydır ki, həll olunub.
 
"Bu uşaq bizim məktəbə yeni gəlib. Bir il yarımdır ki, bu şagird bizim məktəbdə oxuyur və mütəmmadi olaraq məktəbə gəlir. Müəllimlər onu yaxşı oxuyan ağıllı uşaq kimi tanıyır. Ona qarşı heç bir zorakılıq və təhdid olmayıb. Sadəcə olaraq müəlliməsi ona "saçını niyə uzun saxlamısan, niyə qız kimi üzük taxırsan” kimi sözlər deyərək, ona başqaları kimi olmadığı üçün irad tutub. Bu da onun xətrinə dəyib və ona pis təsir edib.  Biz uşağın dincəlməsi və özünə gəlməsi üçün bir həftəlik icazə vermişik”, - direktor bildirib.