Gədəbəydə polislə vətəndaşlar arasında insident baş verib - Video - Yenilənib

 Bu gün günorta saatlarında Gədəbəy rayonu Söyüdlü kəndində bir qrup şəxs kənd ərazisində inşa olunan süni gölün tikintisinə qanunsuz müdaxilə edib. 

DİN-in mətbuat xidmətindən bildirilib ki, həmin şəxslərə dəfələrlə xəbərdarlıq edilməsinə, izahedici söhbətlər aparılmasına baxmayaraq, onlar qeyd olunan əraziyə toplaşıblar. 

Onlar polisin qanuni tələblərinə qəsdən tabe olmayaraq daşla, küt alətlərlə bir neçə fəhləyə xəsarət yetirib və polis əməkdaşlarına qarşı müqavimət göstərməyə cəhd ediblər. Görülmüş tədbirlərlə qanunsuz aksiyanın iştirakçıları ərazidən uzaqlaşdırılıblar.

O ki qaldı videogörüntülərdə polis əməkdaşının qadınlardan birinə gözyaşardıcı qaz tətbiq etməsi ilə əlaqədar DİN-in bir qrup əməkdaşı Gədəbəy rayonuna ezam olunub. Həmin fakt üzrə xidməti yoxlama aparılır. 

Xidməti yoxlamanın nəticəsindən asılı olaraq məsələyə hüquqi qiymət veriləcəkdir.

 

19:07

Sosial şəbəkələrdə Gədəbəyin Söyüdlü kəndində vətəndaşlarla polis əməkdaşları araında insidentin yaşandığını əks etdirən kadrlar yayılıb. Bu barədə görüntüləri Meydan tv paylaşıb.

 

Daxili İşlər Nazirliyindən bildirilib ki, bu gün günorta saatlarında Gədəbəyin Söyüdlü kəndində bir qrup şəxs kənd ərazisində inşa olunan süni gölün tikintisinə qanunsuz müdaxilə edib.

"Polis əməkdaşları tərəfindən qaydalara əməl etməyən şəxslərlə profilaktiki iş aparılmaqla onlar ərazidən kənarlaşdırılıb. Araşdırma aparılır”, - məlumatda deyilir.

 

Kadrlarda əraziyə xeyli sayda vətəndaşın toplaşdığı, polis əməkdaşlarının gözyaşardıcı qazdan istifadə etdiyi müşahidə olunur, atəş səsləri eşidilir.