Rusiyadakı hadisələr qonşu ölkələrdəki meyvə qiymətlərini aşağı salıb

"Rusiya rublunun kəskin devalvasiyası və yolların bağlanması mövsümi meyvələrin əsas bazara çatdırılmasını mümkünsüz edib. Nəticədə bu gün Gürcüstan, Ermənistan, Azərbaycan, İran və Türkiyədə şaftalı və nektarinin qiymətində kəskin ucuzlaşma müşahidə olunub. Sözün əsl mənasında, bir gündə bu meyvələrin qiymətləri demək olar ki, iki dəfə azalıb - hər kq üçün 0,80 dollardan 0,45 dollara qədər və qiymətlərdə enmə tendensiyası davam edir”, - FAO-nun beynəlxalq məsləhətçisi Fedor Rıbalko bildirib. 

Yaxın gələcəkdə meyvə-tərəvəzin topdansatış qiymətlərinin Mərkəzi Asiya ölkələrində: Özbəkistan, Qazaxıstan və Tacikistanda da kəskin ucuzlaşacağı gözlənilir. Ancaq təbii ki, çox şey Rusiyada baş verən proseslərdən asılı olacaq. İndi daş meyvələrin satışı mövsümünün zirvəsi olduğu üçün bu xəbər regionun bütün ölkələrində bağbanlar üçün ciddi zərbədir, çünki bu ölkələrin Rusiya bazarına real alternativi yoxdur.

www.anews.az