Bayramda Şahdağ Turizm Mərkəzinə gələn qonaqların sayı açıqlanıb

Şahdağ Turizm Mərkəzinə Qurban bayramı münasibətilə ümumilikdə 2 min 983 qonaq qəbul edib. Bu barədə Turizm mərkəzinin mətbuat katibi Orxan Bədəlov bildirib.

Onun sözlərinə görə, qeyri-iş günlərində gələn qonaqların 4 min 747 nəfəri turist olub.

Cari ilin yanvar-iyununda turizm mərkəzini 70 minə yaxın şəxs ziyarət edib, hotel xidmətlərindən isə yerli və xarici turist olmaqla 26 minə yaxın qonaq istifadə edib.

 

2022-ci ilin məlumatlarına görə, istirahət mərkəzinə 109 minə yaxın ziyarətçi səfər edib.

 

Ötən il "Şahdağ Turizm Mərkəzi” 8 milyon 687,5 min manat xalis zərər edib. 2021-ci ildə şirkət 6 milyon 343.6 min manat xalis zərər açıqlamışdı.

 

2022-ci ildə "Şahdağ Turizm Mərkəzi”nin cəmi aktivləri 3.2% azalaraq 302 milyon 203.7 min manat, cəmi öhdəlikləri isə 37.3% azalaraq 1 milyon 874 min manat olub.

2023-cü il yanvarın 1-nə turizm mərkəzinin cəmi kapitalı 300 milyon 329.7 min manat təşkil edib ki, bu da illik müqayisədə 2.8% və ya 8 milyon 687,5 min manat azdır.

"Şahdağ” Turizm Mərkəzi Qusarın mərkəzindən 32 km məsafədə, Şahdağ Milli Parkının yaxınlığında, dəniz səviyyəsindən 1435 - 2552 metr yüksəklikdə yerləşir.