Naxçıvan Uşaq Gənclər Yaradıcılıq Mərkəzində müəllimlərdən pul yığılır- İDDİA

İddiaya görə, mənimsənilən vəsaitin yerinin doldurulması üçün müəllimlərdən məcburi qaydada pul yığılır.

"Mərkəzin rəhbərliyi dərnəklərə yazılan pulları mənimsəyir, onlara etiraz edən, qanunsuz əməllərinə tabe olmayan müəllim və işçilərə təzyiq edir. Deyirlər ki, bizlik deyil, yuxarıdan nə deyirlərsə, onu edirik. Dövlət hər il keçirilən "STEAM Təhsil Festivalı”ına vəsait ayırsa da, həmin pullar mənimsənilir. Sonra isə müəllim və işçilərdən 30 manat pul gətirmək tələb olunur. Sonuncu festivalda pul yetmədiyi üçün əlavə 50, 100 manatdan pul yığmaq tələb olundu. Etiraz edənlər olduğu üçün iş Təhsil Nazirliyi səviyyəsinə qalxdı”,- müəllimlər bildirib.

Müəllimlər deyib ki, məsələ böyüyüb, şikayətlər Naxçıvan MR Təhsil Nazirliyi səviyyəsinə çatdıqdan sonra gözdən pərdə asmaq üçün, pul yığımını müvəqqəti dayandırmaq tapşırığı verilib, lakin ara sakitləşəndən sonra yenə öz işlərinə davam ediblər

"Təhsil naziri deyib ki, elə edin ki, pul söhbətinin səsi çıxmasın. Amma müvəqqəti. Bir müddət sonra pul yığımı davam etdi. Könüllü gətirən gətirsin, deyib, yığmağa davam etdilər. Bu işlərin başında nazirlik özü dayanır. Pulu yığıb, bir qismini ora ötürürlər”.

Müəllimlər bildirib ki, festivallarda uşaqların geyinməsi üçün nəzərdə tutulan formaları belə onlara aldırırlar. Festivaldan sonra isə həmin formalar şagirdlərin əlindən alınır.

"Tək bu deyil. Mikrofon, səsgücləndirici və müəyyən avadanlıqlar almaq adı ilə də müəllimlərdən məcburi pul yığılır. Məsələn, sonuncu festivalda səsgücləndirici üçün müəllimlərdən ümumilikdə 1000 manat pul yığılıb",müəllim bildirib.

Naxçıvan şəhər UGYM-dən müəllimlərin iddialarına cavab verilməyib.