Yaxın zamanda 4 seçki keçirilməsi gözlənilir - Millət vəkili

 

 

Millət vəkili ilk öncə referendumun keçiriləcəyini açıqlayıb. 

 

Politoloq Tural İsmayılovun sözlərinə görə, strateji dəyişikliklərlə bağlı müxtəlif müzakirələr aparılsa da bunun hələ ki, real bir əsası yoxdur, ona görə də Erkin Qədirlinin bu fikirləri onun öz şəxsi yanaşması hesab edilməlidir.

 

"Hesab edirəm ki, referendum və seçkilərlə bağlı istənilən proqnozu vermək olar, amma nəzərə almaq lazımdır ki, bu gün Azərbaycanda dövlət tərəfindən, Mərkəzi Seçki Komissiyası tərəfindən hansısa referendum və növbədənkənar seçkilərdən bəhs edilmir. Bu baxımdan Erkin Qədirlinin fikirləri onun öz yanaşması hesab edilməlidir. Eyni zamanda strateji dəyişikliklərlə bağlı müxtəlif müzakirələr aparılsa da bunun hələ ki, real bir əsası yoxdur. İndiki məqamda hökumət hansısa bir formada yeni seçkilər hazırlığında deyil və yaxud da bu seçkilər keçirilsə belə əminəm ki, seçkilərdən çox uzun müddət keçməyən bir ərəfədə hökumət informasiya yayacaq. Yəni payızda Erkin Qədirlinin iddia etdiyi kimi hansısa dəyişikliklər gözlənilsəydi, məncə bununla bağlı artıq indidən müəyyən rəsmi məlumatlar verilə bilərdi. Ona görə də hansısa rəsmi məlumat olmadan millət vəkillərinin, ictimai fəalların, media nümayəndələrinin Azərbaycanda referendum və növbədənkənar seçkilərlə bağlı fikirləri sadəcə şəxsi proqnozdur. Rəsmi dayağı olmayan məlumatların real olmadığını düşünürəm”, o bildirib.

 

Siyasi şərhçi Aqşin Kərimovun bildirir ki, referendum keçirilsə İcra başçısı institutu və Naxçıvanın muxtar respublika statusu ləğv ediləcək.

 

"Referendum keçiriləcəyi iddiaları yeni deyil, ümumiyyətlə bu, regionda baş verən ictimai-siyasi dəyişikliyə adekvat reaksiya zərurətindən yaranır. Referendum keçirilsə böyük ehtimalla Nazirlər Kabineti, icra başçısı institutu, Naxçıvanın muxtar respublika statusu ləğv ediləcək. Parlamentdə deputat yerlərinin artırılması da gözlənilir, çünki hazırki deputat sayı artan əhali sayına uyğun deyil. Həmçinin Vitse-prezidentlik institutunun səlahiyyət və vəzifələri Konstitusiya ilə geniş şəkildə təsbit edilərək funksiyaları müəyyən ediləcək", - Kərimov öz sosial hesabında yazıb. 

 

Dövlət müstəqilliyi 1991-ci ildə bərpa olunan Azərbaycanda parlamentin səlahiyyət müddəti 5 ildir. 1995-ci ilin ilk parlament seçkisindən (12 noyabr) sonra qüvvəyə minən konstitusiya parlament seçkisinin hər 5 ildən bir noyabr ayının birinci bazar günü keçirilməsini müəyyən edib. 2000, 2005, 2010 və 2015-ci illərin parlament seçkiləri həmin hökmə uyğun təşkil olunub.

2020-ci ilin parlamenti noyabrın 1-də seçilməli idi. Amma 2019-cu il dekabrın 5-də parlament buraxılıb, 2020-ci il fevralın 9-na növbədənkənar parlament seçkisi təyin edilib.

 

 

Sonuncu dəfə Azərbaycanda 26 sentyabr, 2016-cı ildə konstitusiyaya dəyişiklik etmək məqsədi ilə referendum keçirilib.

 

Konstitusiyaya edilən dəyişiklik nəticəsində Azərbaycanda prezidentin səlahiyyət müddəti 5 ildən 7 ilə qədər uzadılıb, həmçinin prezidentə növbədənkənar dövlət başçısı seçkisini elan etmək səlahiyyəti verilib və prezidentlik vəzifəsi üçün tələb olunan minimal [35 yaş] yaş həddi aradan qaldırılıb. Bundan əlavə, dəyişiklik nəticəsində Azərbaycanda vitse-prezidentlik postu yaradılıb.

 

Azərbaycanda bələdiyyələr 5 il müddətinə seçilir. 1999, 2004, 2009, 2014 və 2019-cu illərin seçkiləri dekabr ayında baş tutub. 2024-cü ilin bələdiyyə seçkilərinin dekabrın 22-də keçirilməsi gözlənir.

Müstəqillik illərində Azərbaycanda 8 prezident seçkisi keçirilib. 1991, 1992, 1993, 1998, 2003, 2008 və 2013-cü illərin seçkilərində prezident 5 il müddətinə mandat alıb (ilk iki seçkidə seçilənlər müddəti tamamlaya bilməyib).

2016-cı ildə prezidentin səlahiyyət müddəti 7 ilə qaldırılıb. 2018-ci il aprelin 11-də prezident 7 il müddətinə seçilib və növbəti seçki 2025-ci ilin aprel ayında olmalıdır.