Bu hüquq pozuntusudur - Natiq Cəfərli Ədliyyə Nazirliyindən yazdı

18.07.2023 15:32

Ədliyyə Nazirliyinin telefonu olmayanları partiya üzvü kimi qəbul etməməsi hüquq pozuntusudur. Bunu Respublikaçı Alternativ Partiyasının (REAL) Siyasi Komitəsinin üzvü Natiq Cəfərli deyib.

"Konstitusiyaya görə hər bir şəxs partiya üzvü ola bilər, amma elə bir qanun yoxdur ki, hamının telefonu olmasını məcburi etsin – bəlkə kimsə telefon işlətmir, nazirliyin "məntiqinə” görə həmin şəxs partiya üzvü ola bilməz. Bu birbaşa hüquq pozuntusudur. İstənilən şəxs hardan bilsin ki, zəng edən Ədliyyə Nazirliyindəndir, nədən zəng edənə doğru cavab verməlidir ki?! Bəlkə telefonla ondan başqaları şəxsi məlumatlar almaq istəyir. Təqdim etdiyimiz say qədər bizdə imza və ərizələr var, yaxşı, indi nə önəmlidir, şəxsin imzası, ərizəsi, ya nazirliyin geyri-legitim zəngi. 2500-ə yaxın şəxsin məlumatlarının bazada tapılmadığını deyiblər, yaxşı, bunlar kimlərdir, nədir uyğunsuzluq?! Bəlkə kimsə ərizə dolduranda hərf səhvi edib, bu onun siyasi partiyaya üzv olmasını niyə əngəlləməlidir ki?!", - Cəfərli sosial hesabında paylaşıb.

Partiya rəsmisi bildirib ki, REAL-ın onlarla üzvünə zəng edilməyib.

"Onlarla, bir daha deyirəm, onlarla üzvlərimiz var ki, onlara heç bir zəng olmayıb, hətta REAL Gənclər Birliyinin idarə heyətinin üzvünə belə zəng olunmayıb – yaxşı, Nazirlik zəng etmədiklərini hansı kateqoriyaya aid edib?! İlqar Məmmədova, Erkin Qədirliyə də zəng olmayıb, onları, görəsən, nazirlik üzv sayıb, ya yox?! Əgər üzvlük üçün əsas kriteriyanı nazirlik, zəng etməyi sayırsa, o zaman sədr və parlament təmsilçimiz də üzv kimi o siyahıya düşməyib. Nazirlik deyir ki, 986 nəfər onlara zəng edərkən üzv olmadığını deyib - şəxsən mənə bir neçə nəfər yazıb, zəng edib deyib ki, zəng gələndə fikir verməyiblər, təlaşa düşüblər, "yox" deyiblər, amma sonra fikirləşiblər ki, səhv ediblər - yaxşı, onlar öz səhvini necə düzəldə bilərlər, bunun mexanizmi yoxdur”, - Natiq Cəfərli vurğulayıb.

İyulun 17-də Respublikaçı Alternativ Partiyasının sədri İlqar Məmmədov bildirib ki, Ədliyyə Nazirliyi REAL partiyasının 463 üzvünün təsdini qəbul edib.

Partiyalar haqqındaki yeni qanuna əsasən 2023-cü ilin mart-iyulunda 25-dən çox partiya öz fəaliyyətinə xitam verib.

Prezident İlham Əliyev 2023-cü ilin yanvarın 11-də "Siyasi Partiyalar haqqında" qanunu təsdiqləyib.

2022-ci il dekabrın 16-da Milli Məclisdə "Siyasi partiyalar haqqında" yeni qanun layihəsi ümumilikdə 100 dəyişilklik edilməklə III oxunuşda qəbul olunub.

Layihə 6 fəsil, 30 maddədən ibarətdir.

Layihə Venesiya Komissiyasının 233 tövsiyəsindən seçki prosesi ilə bağlı olmayan və sırf siyasi partiyanın statusuna və fəaliyyətinə aid 132 tövsiyəsindən 112-si nəzərə alınıb.

"Siyasi partiyalar haqqında" layihə ən son 1992-ci ildə qəbul olunmuşdu.

Gülnar Nazimqızı

www.anews.az

Xəbəri bəyəndiniz?

Sosial şəbəkələrdə paylaş