Azərbaycanda su itkisinin həcmi açıqlanıb

2023-cü ilin yanvar-iyununda Azərbaycanda su mənbələrindən 4,9 milyard kubmetr su götürülüb, bunun 3,6 milyard kubmetri əkin sahələrinə sərf edilib.  Beləliklə, götürülən suyun 1,3 milyard kubmetri və ya 26,5 %-i itkiyə gedib. Bu barədə "Azərbaycan Meliorasiya və Su Təsərrüfatı” ASC-yə istinadən Report xəbər verib. 

"Su itkisinə qarşı görülən tədbirlər çərçivəsində hesabat dövründə suvarma sistemlərində və kollektor-drenaj şəbəkələrində 17,58 milyon kubmetr həcmində lildən təmizləmə işləri həyata keçirilib. Eyni zamanda çay məcralarında 4,173 milyon kubmetr həcmində məcratəmizləmə və tənzimləmə, o cümlədən bəndlərin yüksəldilməsi və möhkəmləndirilməsi üzrə 2,924 min kubmetr həcmində torpaq işləri görülüb, sahilbərkitmə tədbirləri üzrə 1 883 pm uzunluğunda mühafizə bəndləri tikilib",  - məlumatda bildirilib. 

6 ay ərzində həyata keçirilən meliorativ tədbirlər nəticəsində 1,3 min hektar yeni suvarılan torpaq sahəsi əkin dövriyyəsinə əlavə edilib, 800 hektar torpaq sahəsinin meliorativ vəziyyəti yaxşılaşdırılıb. 

www.anews.az