Dubay şirkəti müsadirə edilmiş həmin əmlakla bağlı Ali Məhkəməyə müraciət edib

Şirkət Bakı Apellyasiya Məhkəməsinin qərarından narazıdır.

İddia olunur ki, cinayət işi üzrə müsadirə edilmiş "Baku Non Ferrous And Foundry Company” məhkum Rasim Məmmədova deyil, onlara məxsusdur. Belə olan halda şirkətin avadanlıqları ilə birgə müsadirə olunması mülkiyyət hüququnu pozur.

Xarici şirkəti təmsil edən vəkil Cavad Cavadov bildirib ki, Sumqayıt şəhərində yerləşən sözügedən şirkətin müsadirə olunması onun əsl sahibinin mülkiyyət hüququnun pozulması deməkdir.

 

"Təəssüf ki, Bakı Apellyasiya Məhkəməsi şikayətimizi əsaslı saymadı. İndi həmin qərardan kassasiya şikayəti vermişik. Son vaxtlar Ali Məhkəmənin mülkiyyət məsələləri ilə bağlı ədalətli qərarlar çıxardığını görürük. Ümid edirik ki, bu işlə bağlı müsbət qərar qəbul ediləcək və bizim Avropa məhkəməsinə müraciət etməyimizə gərək qalmayacaq.”