Dalğıclar insanları batırır, meyitlərini qohumlarına satırlar! - İDDİA

10.08.2023 18:35

Son vaxtlar sosial mediada çimərlikdə çalışan dalğıcların dənizdə çimən vətəndaşları batıraraq suyun altında bir yerə bağladıqları, daha sonra isə meyiti qohumlarına satdıqları barədə məlumatlara tez-tez rast gəlinir.

Bu iddialarla bağlı sosial şəbəkələrdə araşdırma apardıq.

Zamin Eyvazov adlı istifadəçi yazır:

"İnsanlarıı vodolazlar çəkib aparır, suyun altında bir yerə bağlayır, sonra isə meyiti yiyəsinə çoxlu pul qarşılığında satırlar”.

O, iddia edir ki, suyun altında adamları bağlamaq üçün kəndirdən istifadə olunur.

Ceyhun Məmmədov adlı istifadəçi də eyni fikirdədir.

"Tanıdığım biri dənizdə bir az dərinə gedibmiş. Bu zaman kimsə ayağından tutub batırmaq üçün aşağıya doğru dartıb. Xoşbəxtlikdən özünü itirməyib, o biri ayağıyla adamın üzünə təpik vurub əlindən çıxıb".

Emin Mehdiyev adlı istifadəçi isə iddia edir ki, insanları qəsdən batırmaq üçün dənizdə qarmaqlardan istifadə olunur.

"Dənizdə adam tutmaq üçün qarmaqlar quraşdırıblar, həmin qarmaq və kəndir vasitəsilə dənizdə insanlar məqsədli şəkildə boğulur və ailəsindən pul alaraq qazanc əldə edilir”.

Kriminalist Şəmsəddin Əliyevin sözlərinə görə, bu kimi şaiyələrin yayılması ilk dəfə deyil.

"Bu kimi şaiyələrə daha çox SSRİ dövründə rast gəlinirdi. Deyirdilər ki, guya xilasedicilər suyun altında gəzir və insanların ayağına qarmaq və başqa alətlər bağlayaraq batırırlar. Sonradan isə həmin xilasedicilər müəyyən pul məbləğində meyiti tapıb sahibinə qaytarırlar. Yəni belə xəbərlər indi deyil, o vaxt da gəzirdi. Amma heç cür bunu sübuta yetirmək mümkün olmurdu. Ona görə də bütün bunlar şaiyə olaraq qalırdı”, - o deyib.

Kriminalist bildirir ki, bu məsələnin tənzimlənməsi qaydası çətin bir məsələdir, amma mümkündür.

"Qanunvericilikdə bununla bağlı heç bir nazamlanma yoxdur, amma, olmalıdır. Dalğıcların təyinatı üzrə necə hərəkət etməli olduğu haqqında Fövqəladə Hallar Nazirliyinin öz tələbləri var. Əgər doğrudan da vətəndaşların söylədikləri informasiyalar mötəbər zəminə söykənirsə, təbii ki, bununla bağlı prokurorluq orqanları ərazilər üzrə müəyyən araşdırmalar həyata keçirilməlidir. FHN-nin bu qurumlara nəzarəti həyata keçirən strukturları var. Ola bilsin ki, onların təlimat işləri düzgün aparılmır. Əgər burada vətəndaşlar tərəfindən iddia edilən fikirlər sübut olunarsa, həmin şəxslərə qəsdən adamöldürmə maddəsi ilə cinayət işi açıla bilər. Çünki, bu, ehtiyyatsızlıqdan yox, bilərəkdən həyata keçirilmiş əməldir. Bu kimi halları mətbuatda işıqlandırmağın müsbət cəhəti odur ki, bu cür vəzifəsindən sui-istifadə edən xilasedicilər varsa, bu kimi davranışlardan çəkinə bilərlər. Düşünürəm ki, bu ehtimallar mətbuatda açıqlanandan sonra, ərazi üzrə müvafiq orqanlar bu iddialar barədə müvafiq araşdırmalar aparacaq. Ümumilikdə isə insanların suda batmasının daha çox səbəbi küləkli havada özünə güvənən insanların təyin olunmuş xətlərdən uzağa getməsi və geriyə dönə bilməməsidir. Digər bir səbəb isə heç bir hazırlığı olmayan, üzə bilməyən insanlar dənizdən istifadə edirlər. Nəticədə də boğulurlar. Ona görə də insanlar verilən tövsiyyələrə mümkün qədər çox əməl etməlidirlər”, - Əliyev vurğulayıb.

Fövqəladə Hallar Nazirliyinin (FHN) Kiçikhəcmli Gəmilərə Nəzarət və Sularda Xilasetmə Dövlət Xidmətinin İctimaiyyətlə əlaqələr və təbliğat şöbəsinin rəisi Aqşin Əlili yayılan şaiyələrin tamamilə cəfəngiyyat olduğunu deyib.

"Oncə ölümlə nəticələnən suda boğulma hadisələrinin baş verdiyi ərazilərə nəzər salaq. Bu hadisələr xidmətin nəzarət etmədiyi çimərliklərdə baş verir. FHN tərəfindən aparılan kütləvi maarifləndirmə işlərinə baxmayaraq, yenə də bəzi vətəndaşlar, xüsusilə yeniyetmələr tərəfinfən çimərlik kimi nəzərdə tutulmayan ərazilərdən, suvarma kanallarından, arxlardan, süni göllərdən və digər su hövzələrindən çimərlik kimi istifadə hallarına rast gəlinir ki, bu da bir çox hallarda acı nəticələrə gətirib çıxarır. FHN dövlət tərəfindən nəzərdə tutulmuş çimərliklərdə təhlükəsizlik tədbirləri aparır. İDEA İctimai Birliyinin təşəbbüsü ilə Bakıda altı ictimai çimərlik təşkil olunub. Digər tərəfdən isə Ümumi Dövlət tərəfindən nəzərdə tutulan çimərliklər var. Bu çimərliklərdə dalğıclar vasitəsi ilə sualtı müayinələr aparılır. Bunun da məqsədi odur ki, hansısa ərazidə sualtı axınlar normadan artıqdırsa və yaxud qəfil dərinliklər varsa, eyni zamanda suda yad cisimlər mövcuddursa, bu kimi hallar aşkarlanır və xəbərdarlıq edilir. Ancaq, nəzarət edilməyən çimərliklərdə bu işlər görülmür. Nəticədə də bədbəxt hadisələr baş verir. Vətəndaşların bu iddiası ümumiyyətlə çox bəsit bir yanaşmadır və mümkün olmayan bir şeydir", - FHN rəsmisi bildirib.

O həmçinin nazirliyin vətəndaşları dənizə gedərkən diqqətli olmağa çağırdığını da bildirib.

"Küləyin sürəti saniyədə 10 metrdən artıq olduqda, çimərliklərdən istifadə təhlükəli və qadağandır. Həmçinin hava qaraldıqdan sonra, suya girmək təhlükəlidir. Çünki, qaranlıq olduqda suda quraşdırılmış məhdudlaşdırıcı nişanlar görünmür. Eyni zamanda hər-hansı bir hadisə baş verəndə axtarış-xilasetmədə çətinlik yaranır. Çünki görüntü olmur. Ona görə də biz təklif edirik ki, çimərliklərdə istirahət saatı səhər saat 9-dan, axşam saat 8-dək olsun”, - xidmət rəisi bildirib.

Eltac Nurullazadə

www.anews.az

Xəbəri bəyəndiniz?

Sosial şəbəkələrdə paylaş