Mağazada müştəri ehtiyatsızlığından ziyan dəyən mala görə ödənişi kim etməlidir?

Azərbaycan Respublikası Mülki Məcəlləsinin 152-ci maddəsinə görə, Əmlakın təsadüfən məhv olması və ya təsadüfən zədələnməsi riski, əgər bu Məcəllədə və ya müqavilədə ayrı qayda nəzərdə tutulmayıbsa, mülkiyyətçisinin üzərinə düşür. 

 

Vəkil Vüqar Cavadovun sözlərinə görə, istehlakçı ehtiyatsızlıqdan hər-hansı bir məhsula zərər vurarsa, bu zaman dəymiş ziyan müştəri tərəfindən ödənilməlidir.

 

 

Mülki Məcələnin 615- ci maddəsinə görə Əgər pərakəndə alğı-satqı müqaviləsində, o cümlədən alıcının qoşulduğu standart formaların şərtlərində ayrı qayda nəzərdə tutulmayıbsa, pərakəndə alğı-satqı müqaviləsi satıcının alıcıya kassa və ya əmtəə çekini və ya malın ödənildiyini təsdiq edən digər sənədi verdiyi andan lazımi formada bağlanmış sayılır.

Əgər əmlak alıcıya  qeyd olunan şəkildə kassa , əmtəə çeki və ya malın ödənildiyini təsdiq edən digər sənəd verilməklə alıcının mülkiyyətinə keçməyibsə, əmlakla bağlı risklər mülkiyyətçinin,yəni  sahibkarın üzərinə düşür. 

 

Mülki Məcəllənin 1097- ci maddəsinə görə Mülki hüquq pozuntusu (delikt) nəticəsində fiziki şəxsin şəxsiyyətinə və ya əmlakına vurulmuş zərərin, habelə hüquqi şəxsin əmlakına və işgüzar nüfuzuna vurulmuş zərərin əvəzi zərərvuran tərəfindən tam həcmdə ödənilməlidir.

 

Mağaza qırılan malların qiymətini alıcıdan (əgər bu təsadüfi halla baş verməyibsə) ya könüllü olaraq, ya da məhkəmə qaydası ilə ala bilər . Alıcı mallara vurulan zərərin təqsirkar hərəkətləri nəticəsində baş verdiyinə inanırsa, zərəri könüllü şəkildə ödəyə bilər. Lakin, alıcı özünü təqsirkar hesab etmirsə, mağaza rəhbərliyi onu ziyanın əvəzini verməyə məcbur etməyə haqqı yoxdur.