160 nömrəli Klassik gimnaziyanın direktoru işə qaytarılıb? - Direktordan açıqlama

 

Onun direktor vəzifəsinin daha bir il uzadılması gözlənilir. 

 

Məktəbin direktoru Faina Ələkbərova anews.az-a açıqlamasında bildirib ki, onun müqaviləsinə yaşa görə xitam verilib. 

 

"Amma praktikada belə bir hal var ki, işə xitam verilsə də, müqavilə ilə işinə davam edə bilərəm. Mən hələ məktəbdən tam ayrılmamışam. Əgər qərar verilsə, müqavilə əsasında işimə davam edəcəyəm", - direktor söyləyib. 

 

Bundan əvvəl, Report agentliyi Faina Ələkbərovanın işdən azad olunması ilə bağlı xəbər yazıb. Bakı Təhsil İdarəsi onun işdən azad olunmasını təsdiq edib. 

 

Belə ki, Faina Ələkbərova ilə bağlanmış əmək müqaviləsinə Azərbaycan Respublikası Əmək Məcəlləsinin 68-ci maddəsinin 2-ci hissəsinin "b” bəndinə əsasən (əmək müqaviləsinin müddətinin qurtarmasına görə) 21 iyul 2023-cü il tarixdə xitam verilib. 

 

 

Aytac Zeynalova