Jurnalistlərin həbsi barədə media rəhbərləri nə düşünür...?

 

Bununla da son 10 gündə Azərbaycanda həbs olunan jurnalistlərin sayı 6-a çatıb.

 

Jurnalistlər Birliyinin sədri, Azərbaycan Respublikasının Əməkdar Jurnalisti, ayna.az saytı və Ayna TV-nin təsisçisi Elçin Şıxlının sözlərinə görə, jurnalistlərin həbsi ilə xaricdən grantlar alan jurnalistlərin olduğundan "xəbərimiz var” deməyə çalışırıq. 

"Saxlanılan Əziz Orucovun günahı odur ki, guya hansısa qeyri-qanunu torpaqda nəsə tikib. Ən azından yarım milyon qeyri qanuni tutulmuş torpaqlar və tikililər var. Bunu fikirləşəndə nəsə ittiham edəndə düşünmək olardı. Beyin və ağıl lazımdır. Bu uşaqlar cinayət etməyiblər. Əllərini qandallamağa və tutmağa ehtiyac yoxdur. Saxlanılır, ittiham verilir sonra deyir get otur Bakıdan çıxma. Bu halda özümüz-özümüzə pislik edirik. Bu həbslər əleyhimizə işləyə bilər. Düşmənlərimiz hay-küy salacaq.  Haqq da edəcəklər.  Çünki belə etmək düzgün deyil. Düşünürdük ki, Əli Həsənovun, Ramiz Mehdiyevin komandası gedəndən sonra müsbətə doğru addımlar olacaq. Addımlar atılıb. Sonradan yenidən belə şeylərlə biz korlayırıq. Özümüz-özümüzə ziyan veririk. O uşaqların heç biri əli qandallanası cinayətkar deyillər. Əlinə qandal vurulan adamlar şəhərin mərkəzində  gəzir. Onları tuta bilmirik, quyruqlarını ələ vermirlər”, - Şıxlı bildirib.  

"Yeni Musavat" qəzetinin rəhbəri Rauf Arifoğlu həyat yolu həbsxanadan keçmiş biri kimi jurnalistlərin həbsdə olmasını istəmədiyini söyləyib. 

"Həmkarlarımın həbs olunmasına təəssüf edirəm və üzülürəm. Həbsxanadan keçmiş bir jurnalist kimi bunun olmamasını istəyirəm. Jurnalistlər həbsxanada olmamalıdır. Ümid edirəm ki, çox tezliklə hər şey aydınlaşacaq və araşdırılacaq. Mən şəxsən özüm onlara azadlıq arzu edirəm. Çox arzu edirəm ki, dövlətimiz də bu addımı atsın və qərar versin. Jurnalistlər ən azı istintaq dövrünü evdə keçirsin”, - o əlavə edib. 

 

"Tekeqraf" Media qrupunun rəhbəri Aynur Camalqızının fikrincə, hüquq mühafizə orqanları kimisə saxlayıbsa demək arxasında ciddi səbəb var. 

 

"Mən bu proses barəsində nə qədər açıqlama verilibsə o qədər məlumatlıyam. Ona görə də nəyin doğru, nəyin yalnış olması ilə bağlı heç bir fikir yürüdə bilmərəm. Amma  tam əminliklə o fikirdəyəm ki, hüquq mühafizə orqanları tərəfindən bir nəfər saxlanılırsa deməli onun arxasında çox ciddi səbəblər var. Onlar həbs olunarkən sözün açığı hansı peşəni daşıyıb daşımadıqları nəzərə alınır ya alınmır bu başqa məsələdir. Qanun qarşısında hər bir peşə sahibi bərabərdir. Ona görə də onların jurnalist olduqları üçün saxlanıldığını düşünmürəm",  -  Aynur Camalqızı bildirib. 

Türküstan qəzetinin rəhbəri Aqil Camal hesab edir ki, jurnalistlərin həbsi tam olaraq peşə fəaliyyəti ilə bağlı olmaya bilər. 

Mətbuat Şurasının sədri Rəşad Məcid " jurnalistlərin həbsini diqqətdə saxladığını bildirib. 

 

Dekabrın 1-də Xətai Rayon Məhkəməsi "Abzas Media"nın əməkdaşı Nərgiz Abssalamova ilə bağlı 3 aylıq həbs qərarı verib. Jurnalistə qarşı 206.3.2-ci (qaçaqmalçılıq, qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb.

 

Noyabrın 27-də "Kanal 13"-ün rəhbəri Əziz Orucova qarşı  Cinayət Cinayət Məcəlləsinin 188.2 (Mülkiyyət, istifadə və ya icarə hüququ olmadan torpaq sahəsi üzərində özbaşına tikinti və ya quraşdırma işləri aparma) maddəsilə cinayət işi qaldırılıb. 

 

Bundan əvvəl, "Abzas Media"nın  direktoru Ülvi Həsənli, direktor müavini Məhəmməd Kekalov və baş redaktoru Sevinc Vaqifqızına qarşı Cinayət Məcəlləsinin 206.3.2-ci (qaçaqmalçılıq, qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb.

 

Hər 4 jurnalist barəsində ilkin olaraq 4 ay müddətinə həbs qəti imkanı tədbiri seçilib.