Özəl tibb müəssisələrində icra olunan əməliyyatlara 211 milyon manat ödənilib

2023-cü il İcbari Tibbi Sığorta Agentliyi tərəfindən özəl tibb müəssisələrində icra olunan əməliyyatlara 211 milyon manat ödənilib ki, bu da ötən illə müqayisədə 2 dəfə çoxdur. Bunu İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev deyib.

"Agentliklə müqaviləsi olan özəl tibb müəssisələrində icra olunan əməliyyatların dəyəri Agentlik tərəfindən həmin tibb müəssisəsinə ödənilir. Ödənilən məbləğin artması o deməkdir ki, vətəndaşların dövlət xəstəxanalarında göstərilməsi mümkün olmayan xidməti müqaviləli tibb müəssisəsində alması təmin edilib. Bu xidmətə əlçatanlığın göstəricisidir", - o qurumun illik hesabatını təqdim edərkən məlumat verib.
 
Sədrin sözlərinə görə, özəl tibb müəssisələrində ən çox icra olunan əməliyyat və prosedurlar ürək-damar və oftalmoloji əməliyyatlar, invaziv radioloji xidmətlər olub.

Bundan əvvəl qurumun sözçüsü Aynurə Əhmədova bildirib ki, əmək və ya mülki müqavilə əsasında işləməyən, eləcə də sahibkarlıq fəaliyyəti ilə məşğul olmayan şəxslər 2025-ci ilədək icbari tibbi sığortanın xidmətlərindən ödənişsiz istifadə edə biləcəklər.
 
2022-ci ildə agentlik tərəfindən özəl tibb müəssisələrində icra olunan əməliyyatlara 90 milyon manatdan çox vəsait ödənilib.

2022-ci il İcbari Tibbi Sığorta agentliyinin müqavilə bağladığı özəl müəssisələrin sayı 20-dən 111-ə çatdırılıb. Hazırda qurum 122 tibb müəssisəsi ilə əməkdaşlıq edir. 

Aygün Mirakif