2024-cü ilin aprelindən avtobuslarda yol pulu bank kartı ilə ödənəcək

2024-cü ilin ilk rübünün sonunda ictiami nəqliyyatda yol pulu bank kartları ilə ödənilə bilər. Bunu Rəqəmsal İnkişaf və Nəqliyyat nazirinin müavini Rəhman Hümmətov deyib. 

"İctimai nəqliyyatda bütün növ ödəniş vasitələrindən istifadəyə imkan yaratmaq məqsədilə mövcud nağdsız ödəniş sistemi üzərində  təkmilləşdirmə işləri aparılır.  Sistem yeniləndikdən sonra təmassız texnologiyanı dəstəkləyən, bütün bank kartları və mobil cihazlardan ödəniş etmək mümkün olacaq. 2024-cü ilin yanvardan bir neçə marşrutda ödənişlərin bank kartları ilə edilməsi sınaqdan keçiriləcək. Sınaqlardan sonra 2024-cü ilin ilk rübünün sonunda ödəniş sisteminin ilkin tətbiqinə başlanılması nəzərdə tutulur”, - Hümmətov Rəqəmsal İnkişaf və Nəqliyyatın Mobillik Proqramının təqdimatı zamanı qeyd edib. 

Nəqliyyat eksperti Ərşad Hüseynov qeyd edir ki, nəqliyyatda gediş haqqının bank kartları vasitəsilə ödənilməsi dünyanın bir çox ölkələrində tətbiq edilir.

"Texnoloji olaraq rəqəmsal vasitələrin naviqatorlarda və s. tətbiq etmək lazımdır. Proqram təminatı olmalıdır. Hər şey mükəmməl qurulduqdan sonra heç bir problem yaşanmayacaq. Üstün cəhət ondan ibarətdir ki, artıq əlavə kartlara ehtiyac olmayacaq. Bu gün dünyada belə bir sistem var ki, həmin ödənişlər smartfonlar vasitəsilə edilir. Bizdə də bu tətbiq edilərsə, daha yaxşı olar”, - o əlavə edib.

Bank eksperti Əkrəm Həsənov hesab edir ki, vətəndaşlara bank kartı ilə ödəniş etmək imkanı yaradılarsa daha üzərlərində əlavə avtobus kartı gəzdirməli olmazlar. .