Bakı Təhsil İdarəsinə tabe 210 məktəbdə STEAM tətbiq olunur

 

"Elm və Təhsil Nazirliyi tərəfindən reallaşdırılan layihənin məqsədi inkişaf etmiş ölkələrdə müasir çağırışlar əsasında həyata keçirilən təhsil yeniliklərinin ölkəmizdə tətbiqi imkanlarının öyrənilməsi və tədrisindən ibarətdir", - məlumatda deyilir. 

 

Bundan əvvəl Bakıda Elm və Təhsil Nazirliyi tərəfindən STEAM festifalı keçirilib. Festifalda 11 ölkə təmsil olunub. Final mərhələsində ümumilikdə 868 yerli, 159 xarici iştirakçı yarışıb. 

 

SAF 2023 - Beynəlxalq STEAM Azərbaycan Festivalında müxtəlif yarış kateqoriyaları üzrə iştirak edəcək 96 nəfər münsif heyəti İngiltərə, Norveç, Slovakiya, Bolqarıstan, Danimarka, Çexiya, Türkiyə, Azərbaycan kimi ölkələri təmsil edib. 

 

Elm və təhsil naziri Emin Əmrullayev festivalda çıxışı zamanı 2025-ci ildə yeni təhsil standartlarının hazırlanacağını və orada STEAM-ın milli kurikulum hissəsinə çevriləcəyini qeyd edib. O bildirib ki, yeni standartlarda 3D Robotexnika Texnologiya fənninin məzmununa daxil ediləcək. Bu, həm dərslik, həm də tədris proqramlarında öz yerini tapacaq.

 

Təhsil Nazirliyinin Təhsil İnstitutunun dəstəyi ilə "STEAM Azerbaijan" layihəsi 2019-2020-ci tədris ilindən start götürüb.
STEAM təhsil metodu 5 əsas disiplinlərin birləşik şəkildə təşkilidir. Elm (Science), Texnologiya (Technology), Mühəndislik (Engineering), İncəsənət (Art), Riyaziyyatın (Math) birgə və inteqrasiya olunmuş şəkildə tədris etmək ideyası üzərində qurulub. 

 

Gülnar Nazimqızı