Poliklinika ölüm haqqında arayışı nə zaman verməyə bilər? - ARAŞDIRMA

TƏBİB-dən anews.az-a verilən məlumata görə,  zorakı ölümə şübhə olduğu təqdirdə, ölüm hadisəsinin qeyri-yaşayış sahələri və ümumi istifadədə olan ərazilərdə baş verməsi, vəfat edən şəxsin yaşadığı ərazi üzrə ilkin tibbi-sanitariya yardımı ilə bağlı tibb müəssisəsinə təhkim olunması üçün müraciət etməməsi, habelə qeydiyyatda olduğu və ya faktiki yaşadığı ərazi üzrə ambulator tibb müəssisələrində uzun müddət ərzində dövri müayinələrdən keçməməsi, ölümün naməlum səbəblərdən baş verməsi və s. hallarda vəfat edən şəxsin ailə üzvləri və ya yaxınları tərəfindən ölüm haqqında tibbi şəhadətnamənin əldə edilməsində çətinliklər yarana bilər.
 
"Ölüm hadisəsi yaşayış yerində (kənd və qəsəbə istisna olmaqla) baş veribsə, Təcili və Təxirəsalınmaz Tibbi Yardım Stansiyasının (TTTYS) həkimi ölüm hadisəsini təsdiq edir, bu barədə çağırış vərəqəsində qeydiyyat aparmaqla vəfat edənin şəxsiyyətini təsdiq edən sənəd əsasında "Xəbərdarlıq vərəqəsi”ni ölüm haqqında şəhadətnaməni vermək hüququ olan tibb müəssisələrinə təqdim etmək üçün doldurur və ölüm hadisəsi barədə ərazi üzrə polis və ya prokurorluq orqanına (hüquq-mühafizə orqanı) məlumat verir. Ölüm hadisəsi rayonun (şəhərin rayonu istisna olmaqla) kənd (qəsəbə) yerində baş veribsə, kənd sahə xəstəxanasının (həkim məntəqəsinin) həkimi və ya tibb məntəqəsinin feldşeri ölüm hadisəsini təsdiq edir və hadisə barədə hüquq-mühafizə orqanına məlumat verir. Zorakı ölümə şübhə olduğu hallarda, TTTYS-in həkimi və ya kənd sahə xəstəxanasının (həkim məntəqəsinin) həkimi və ya tibb məntəqəsinin feldşeri hüquq-mühafizə orqanlarının nümayəndəsi gələnə qədər meyitin yanında gözləməlidir”, - TƏBİB  açıqlamasında yazılıb. 
 
Deputat Müşfiq Məmmədli bildirir ki, ölüm haqqında hüquqi arayışın verilməsi üçün ölüm aktı müəyyən edildikdən sonra aktın zorakı ölüm olub-olmaması, xəstəlikdən vəfat etməsi və s. hallarla bağlı ekspertiza rəyinə ehtiyac var.
 
"Qanuni olaraq ilk növbədə vətəndaşın ölüm anı müəyyənləşməlidir. Bəzən vətəndaş qohumunun, yaxının vəfatından 2-3 gün sonra müraciət edərək ölümü təsdiq edən arayış tələb edirlər. Əgər ölüm anı müəyyən edilmədən poliknikaya müraciət edilərsə, bu zaman o, arayış verə bilməz. Vətəndaşın ölüm anını həmin çağırışa çağırılmış həkim müəyyənləşdirə bilir. Həkim gəlir və meyit aşkar edilir. Daha sonra hüquq mühafizə orqanına müraciət edilməldir, eyni zamanda müvafiq olaraq çağırışa təcili yardım və ya sahə həkimi gedibsə, arayış verir ki, burada ölüm halı aşkarlanıb. Amma digər məsələlərdə (vətəndaşın ölümdən sonra dəfn pulunun ödənilməsi, işlədiyi işlə bağlı və s) hüquqi arayışın verilməsi üçün ölüm aktının zorakı ölüm olmaması, xəstəlikdən dünyasını dəyişməsi və s ilə bağlı ekspertiza rəyinə ehtiyac var. Qəfil ölümlər barəsində patoloji araşdırılma aparılmalı və vəfat etmiş şəxsin zorakı ölüm halı inkar edilməlidir. Bu da anotomik müayinələr zamanı müəyyənləşir”, - o əlavə edib.
  
Hüquqşünas Sahib Məmmədov ölüm barəsində arayışın verilməsi üçün detalların öyrənilməsinin vacib olduğunu qeyd edib.
 
"Arayışların verilməsi avtomatlaşdırılmış qaydada həyata keçirilir.  Bunun detallarını öyrənmək lazımdır. Gərək sənədlərə baxılsın ki, insan necə ölüb, ölüm səbəbi nədir? Öləndən sonra onun səbəbi bildirilməyibsə, poliknika ona görə sənədi verə bilməz. Əgər ölüm aktı qeydə alınıb, ölüm səbəbi göstərilib, amma poliknika arayış vermirsə, bu zaman vətəndaş inzibati qaydada poliknikadan şikayətçi ola bilər. Bu zaman poliknikanın əsaslandırılmasının qanuni yoxsa, qanunsuz olduğu müəyyən edilə bilər. Qanunsuz olduğu təqdirdə vətəndaş məhkəməyə müraciət edərək ölüm haqqında arayışın alınması üçün çəkilən xərcləri poliknikadan tələb edə bilər”, - hüquqşünas qeyd edib.

www.anews.az