Valideyn müəllimi kobudluqda qınayır, məktəb isə bunu təkzib edir - ŞİKAYƏT - YENİLƏNİB

 

"Şagird müəllimdən tualetə getməyə icazə alıb. Amma müəllim icazə verməyib. O da qorxusundan şalvarını bulaşdırıb. Neçə dəfə yemək qoymuşam. Uşaq yeməyi yemədən evə gətirib. Soruşuram ki, ay bala niyə yeməmisən? Deyir ki, ay ana, müəllimə qoymadı, dedi ki, mən nə vaxt deyərəm onda yeyərsiniz. Uşaqlar basqı altında daha betər vəziyyətlərə düşür. Yaxşı ki, mən övladımı o məktəbdən çıxartdım. Uşağım deyir ki, müəllim sinif yoldaşımın qulağından tutub yerə çırpıb. Mənim uşağımın da başına dəftərlə vurub. Uşağım bundan çox qorxub", - valideyn qeyd edib.  

Bakı Təhsil İdarəsi uşaqlara psixoloji təzyiq göstərən müəllimlə bağlı artıq rəsmi şikayət daxil olmadığı açıqlamasını versə də, yanvarın 25-i səhər saatlarında valideyn Elm və Təhsil Nazirliyinə rəsmi qaydada müraciət edib və Qaynar xətt ilə əlaqə saxlayıb. Lakin onun müraciətinə hələ cavab verilməyib. 

 

Bu gün axşam saatlarında  317 nömrəli  tam orta ümumtəhsil məktəbindən  redaksiyaya daxil olan açıqlamaya görə, məktəb uşaqlara müəllim tərəfindən sonradan təzyiq edilməsi xəbəri həqiqətə uyğun deyil. 

"Yanvarın 25-də  valideynlər məktəb rəhbərliyi tərəfindən məktəbə dəvət olunub. Məktəb direktoru və psixoloq valideynlərlə müvafiq söhbət aparıb. Valideynlərin heç biri müəllimin ilk hadisədən sonra uşaqlara təzyiq göstərməsi ilə bağlı narazılıq bildirməyib. Həmçinin Suraxanı rayonu üzrə Polis İdarəsinin Yeniyetmələrlə iş şöbəsində də valideynlərlə görüş keçirilib və onlardan yazılı məlumat alınıb.  Valideynlər müəllimdən heç bir narazılıqları olmadığını qeyd ediblər", - açıqlamada qeyd olunub.