Ötən il yol qəzalarında ölən və yaralanan şəxslərin sayı açıqlanıb

2023-cü ildə Azərbaycanda 1636 yol-nəqliyyat hadisəsi (YNH) qeydə alınıb, 862 nəfər həlak olub. Bu barədə Dövlət Statistika Komitəsi məlumat yayıb.


"2023-cü ildə 1636 yol-nəqliyyat hadisəsi baş verib (2022-ci illə müqayisədə 1,9% azalma), bu hadisələr nəticəsində zərərçəkənlərin sayı 2,7% azalaraq 2229 min nəfər təşkil edib. Onlardan 862 nəfər ölüb (artım 3,4%), 1367 min nəfər yaralanıb (azalma 6,1%)”, - komitənin açıqlamasında bildirilib. 


Yol-nəqliyyat hadisələri nəticəsində həlak olanların 75,4 faizi, xəsarət alanların isə 72,3 faizi kişilərdir.


Ötən il sərxoş vəziyyətdə avtomobil idarə etmə nəticəsində ölüm və ya xəsarətlə nəticələnən 22 hadisə baş verib, nəticədə 6 nəfər ölüb, 29 nəfər xəsarət alıb. Qəzaların 17-si avtomobil sürücüləri tərəfindən törədilib.


Hesabat dövründə baş vermiş yol qəzalarının 39,7 faizi piyadaların vurulması ilə nəticələnib.


"Bütün yol-nəqliyyat hadisələrinin 39,7 faizi avtonəqliyyat vasitələrinin və piyadaların, 38,2 faizi bir neçə nəqliyyat vasitəsinin, 22,1 faizi bir nəqliyyat vasitəsinin iştirakı ilə baş verib”, - açıqlamada bildirilib.


Statistik məlumatlara görə, hadisələrin 42,5 faizi gündüz, 38,9 faizi gecə, 18,6 faizi axşam saatlarında, 31,5 faizi isə istirahət günlərində baş verib.
 
N.Təbrizli