53 saylı məktəbdə şagirdin döyülməsi iddiasına BŞTİ-dən açıqlama - Yenilənib

 

 

"53 saylı məktəbdən "xoş" xəbərlər gəlir. 7-ci sinif şagirdini sinif yoldaşları başına ağır zərbələr vurmaqla xəsarət yetiriblər. Hadisə məktəbdə olub. həmin uşağa qarşı ilk hadisə deyil və direktora bu barədə dəfələrlə deyilib. Direktor isə indiyənə kimi heç bir tədbir görmür", - vəkil öz facebook hesabında yazıb. 

 

Məsələ ilə bağlı 53 saylı məktəblə əlaqə saxladıq. Adını bildirməyən məktəbin işçisi bildirdi ki, hadisədən məlumatı yoxdur. Məktəb rəhbərliyi də iclasdadır. 

 

Bakı Şəhər Təhsil İdarəsindən məsələnin araşdırıldığı bildirilib.

 

Əldə etdiyimiz məlumata görə döyülməsi iddia edilən uşaq 53 saylı məktəbdə bu il gəlib. 

 

Bir gün əvvəl 156 saylı məktəbdə məktəbin keçmiş şagirdi həmin məktəbdə oxuyan 11-ci sinif şagirdi tərəfindən bulinqə məruz qalıb. Baş verən hadisə ilə bağlı məktəbin şagirdinə Daxili İşlər Nazirliyi tərəfindən cinayət işi açılıb. 

 

 

Daxili İşlər Nazirliyinin (DİN) Mətbuat xidmətinin əməkdaşı Nurlan Əliyev bildirib ki, bununla bağlı polis orqanına bu gün müraciət daxil olub. 

 

"Bununla bağlı vətəndaş polis orqanına bu gün müraciət edib. Uşaq valideyni ilə birgə polis orqanına dəvət olunub. Hazırda araşdırma aparılır. Nəticəsi barədə məlumat veriləcək", - Əliyev açıqlamasında söyləyib.

"53 nömrəli tam orta məktəbdə qısnamaya məruz qaldığı iddia olunan uşaq 2023-cü ilin sentyabrından VII sinfin şagird kontingentinə daxil olub. Uşaqlar arasında mübahisə yaranması ilə bağlı məsələ məktəb rəhbərliyinin nəzarətindədir. Uşağın nənəsinin müraciətləri nəzərə alınaraq dərs ilinin əvvəlində direktorun iştirakı ilə həmin sinfin valideyn iclası da çağırılıb. İclasda sinifdə ciddi problem olmadığı və şagirdin sinfə adaptasiya baxımından çatinlik yaşadığı məlum olub. Bundan sonra şagirdə məktəb psixoloqu və müəllimlərin dəstək tədbirləri artırılıb. Sinif rəhbəri də 2023-cü ilin noyabr ayında daha təcrübəli müəllimlə əvəz edilib", - qurumun açıqlamasında deyilir. 

 

Hazırda 53 saylı məktəb  "Məktəblinin dostu” və "Şagird davranış qaydaları” layihələrinə qoşulub.

Gülnar Nazimqızı