Bəxtiyar Hacıyev xaricə köçməsi və qayıtmasından danışıb - MƏHKƏMƏDƏN REPORTAJ

06.04.2024 20:39

Bakı Ağır Cinayətlər Məhkəməsində ictimai-siyasi fəal Bəxtiyar Hacıyevin məhkəməsi davam edir.

O, 2022-ci ilin dekabrında Yasamal rayon Məhkəməsində Ülviyyə Alovluya qarşı xuliqanlıq, icra məmuru Orxan Abdullayevə xəsarət yetirmə, məhkəməyə hörmətsizlik ittihamları ilə həbs olunub. Sonradan ona yeni hallar kimi QHT fəaliyyətinə görə, əlavə maddələr verilib və istintaq müddəti bir neçə dəfə uzadılıb. İstintaq orqanı Hacıyevi qaçqmalçılıqda, qanunsuz sahibkarlıqda, sənədi saxtalaşdırmaqda, müxtəlif beynəlxalq təkilatlardan qrantlar alıb təyinatı üzrə xərcləməməkdə təqsirləndirir.

Aprelin 5-də davam edən məhkəməyə zərərçəkən və şahidlər gəlməyib. Hakim məhkəmə iclasına müttəhimin sorğu-sual olunmasıyla davam edib. Bəxtiyar Hacıyev bildirib ki, həbsini siyasi sifariş hesab etdiyi üçün yalnız siyasi sualları cavablandıracaq.

Bəxtiyar Hacıyev vəkillərin suallarını cavablandırarkən deyib ki, 2013-cü ildə Praqaya gedib. Məqsədi işgüzar və şəxsi həyatını orada qurmaq, davam etmək olub. Ancaq bəzi məmurlar dövlət başçısının adından ona ölkəyə qayıtmağı təklif edib. O, 2015-ci ildə ölkəyə qayıdıb və indi buna peşmandır.

"Ən böyük səhvim odur ki, inandım və qayıtdım. Öz şirkətlərimi qurub, tələbələrin xaricdə təhsil almasıyla bağlı layihələr etdim, özümə iş qurdum. Ancaq elə o vaxtdan məni sıxmağa başladılar. Kaş ki, qayıtmayaydım”, - Hacıyev deyib.

Vəkillər və hakim Bəxtiyar Hacıyevə şirkətlərin yaradılmasından, fəaliyyətindən, maliyyə məsələlərindən xeyli sual verib.

Bəxtiyar Hacıyev şirkətlərin qurulmasında, fəaliyyətində və maliyyəsində hər hansı qanunsuzluğa yol vermədiyini, tam şəffaf fəaliyyət göstərdiyini, vergi ödəyicisi kimi öhdəliklərini vaxtında yerinə yetirdiyini bildirib.

O, üzünü hakim Əli Məmmədova tutaraq, barəsindəki həbs-qətimkan tədbiri dəyişdirilərsə və o, ev dustaqlığına buraxılarsa, müəyyən sənədləri məhkəməyə təqdim edə biləcəyini vurğulayıb.

"Çox demirəm, bircə həftəliyə məni ev dustaqlığına buraxın, gedim, sənədləri yığım gətirim, sübut edim ki, bütün fəaliyyətim qanuni olub. Ancaq sizi də anlayıram, yaxşı bilirəm ki, Sizin buna gücünüz çatmaz. Həbsimi Vilayət Eyvazov sifariş verib, gərək onun da razılığı ola ki, mən ev dustaqlığına buraxılım”, - Hacıyev vurğulayıb.

Ülviyyə Alovlu ilə bağlı epizod ətrafinda sual-cavab vaxtı hakim sənədləri vərəqləyərək Bəxtiyar Hacıyevə "bu pişik məsələsi nədir” – deyə sual verib.

Bəxtiyar Hacıyev bildirib ki, əslində baş verənlər onu təxribata çəkmək üçün əvvəldən hazırlanmış ssenari olub.

"Baş verənlər məni təxribata çəkmək üçün əməliyyat tapşırığı olub. Bu planın məqsədi həm də məni qadına qarşı zorakılıq edən biri kimi təqdim etmək idi. Ülviyyə Alovlu dövlət orqanlarına müraciətlərində də pişik məsələsini önə çəkirdi. Möhrətəm hakim, mən burada siyasi məsələlər haqqında danışmağa başlayan kimi, sözümü kəsirsiz. Amma bayaqdan pişikdən danışıram, heç nə demirsiz. Bu iş bu qədər qeyri-ciddi işdir?”, - Hacıyev hakimdən soruşb.

Məhkəmə müttəhimə zərərçəkənlərdən biri kimi tanınan Orxan Abdullayevlə bağlı suallar verib.

Orxan Abdullayev Yasamal Rayon Məhkəməsində icra məmuru olub. O da Bəxtiyar Hacıyevi məhkəmə salonundan çıxarmaq istəyərkən xəarət alması barədə polisə şikayət edib. Bəxtiyar Hacıyev həmin epizod üzrə məhkəməyə ifadə verərkən bu işin qurama olduğunu söyləyib.

"Ülviyyə Alovlunun şikayəti əsasında başlamış cinayət işinin müddəti başa çatmaq üzrə idi. Orxan Abdullayevi ortaya atdılar, çağırıb ona ərizə yazdırdılar", - Hacıyev deyib.

Bəxtiyar Hacıyev zərərçəkənlərin iştirak etməməsi ilə bağlı iradını bildirərək onların məcburi məhkəməyə verilməsini tələb edib.

Hakimin növbəti məhkəmə iclasını aprelin 19-na təyin etməsi də müttəhimin narazılığına səbəb olub.

"Məhkəmə iclası aprelin 8-də davam etsin və tez yekunlaşsın. 16 aydır ki, həbsdəyəm. 3 aydan çoxdur məhkəmə başlayıb, zərərçəkənlərsə məhkəməyə gəlmir, məhkəmə iclasları arasında uzun müddət fasilələr olur. Mən artıq burada eyni sualları cavablandırmaqdan, eyni şeyləri təkrar-təkrar danışmaqdan bezmişəm”, - o deyib.

Bəxtiyar Hacıyev 9 dekabr 2022-ci il tarixində məhkəməyə hörmətsizlik (Cinayət Məcəlləsinin 221 və 289-cu maddələri ) ittihamı ilə saxlanılıb. Elə həmin ilin iyulunda ona qarşı Cinayət Məcəlləsinin 192 (qanunsuz sahibkarlıq), 193-1 (cinayət yolu ilə əldə edilmiş gəlirlərin leqallaşdırılması) və 206-cı (qaçaqmalçılıq) maddələrilə ittiham irəli sürülüb.

2023-cü il noyabrın 7-də Hacıyevə qarşı Cinayət Məcəlləsinin 213.1-ci (vergi, işsizliyə görə sığorta, icbari tibbi və sosial sığorta ödənişindən yayınma) maddəsilə ittiham irəli sürülüb.

Bəxtiyar Hacıyev hesab edir ki, ona qarşı bütün ittihamlar saxtadır. O əmindir ki, həbsinin və ittihamların səbəbi hakimiyyəti tənqid etməsidir.

Hüquq müdafiəçiləri onu siyasi məhbus kimi tanıyıblar.

Beynəlxalq təşkilatlar Harvard Universitetinin məzunu olan Hacıyüvin dəfələrlə azad edilməsinə çağırıblar.

Günel Əliyeva

www.anews.az

Xəbəri bəyəndiniz?

Sosial şəbəkələrdə paylaş