Artıq narkotik maddələr məktəblərə daxil olur - Siyavuş Novruzov

 

"Mətbuatda gün ərzində 50 nəfərə yaxın şəxsin narkotik ticarəti ilə məşğul olduğu üçün məsuliyyətə cəlb olunduğunu görürürük. Qanunvericilikdə bu məsələ ciddi sərtləşdirilməlidir. Artıq narkotik maddələr məktəblərə daxil olur. Narkomanların müalicəsi üçün də kifayət qədər dispanser yoxdur. Bu cür dispanserlərin tikilməsinə ehtiyac var. Kimi dindirirsən deyir İran vətəndaşından almışam. İran vətəndaşı kimdir? Kimdir bu ölkəni zəhərləyən, insanları zəhərləyən? Bunlar hamısı ciddi araşdırılmalıdır. Bu elə məsələdir ki, hamının qapısını döyə bilər", - deputat aprelin 23-də Milli Məclisdə çıxışı zamanı bildirib.

 

Narkomanlığa və narkotik vasitələrin qanunsuz dövriyyəsinə qarşı mübarizə üzrə Dövlət Komissiyasının hesabatının son statistikasına görə 2024-cü ilin 3 ayında narkomanlığa və narkotik vasitələrin qanunsuz dövriyyəsi  üzrə  2 min 909 cinayət faktı aşkarlanıb.


Bunların 821-i narkotik vasitələrin qanunsuz satışı, 2076-sı narkotik vasitələrin qanunsuz əldə edilib saxlanılması, 12-si isə narkotik tərkibli bitkilərin qanunsuz əkilib becərilməsi ilə bağlı olub.


Cari ililn yanvar-martında qanunsuz dövriyyədən çıxarılmış 1 ton 787 kq 303,666 qr narkotik vasitələrin və psixotrop maddələrin ümumilikdə dəyəri 51 milyon 36 min manat qiymətləndirilib.

Narkotiklərin qanunsuz dövriyyəsi ilə bağlı 1615 nəfər cinayət məsuliyyətinə cəlb edilib, həmin şəxslərdən 1564-ü kişi, 51-i qadın olub.

Gülnar Nazimqızı