İlin sonuna kimi Ağdama köçürüləcək ailələrin sayı açıqlanıb

2024-cü ilin sonuna qədər Ağdamın işğaldan azad olunan üç kəndinə köç təmin ediləcək. Bunu Ağdam, Füzuli, Xocavənd rayonları üzrə Azərbaycan Prezidentinin xüsusi nümayəndəsinin müavini Bəşir Hacıyev bildirib.

 

"Ağdamın Kəngərli kəndinə 292, Xıdırlı kəndinə 719, Sarıcalı kəndinə 203 ailənin köçürülməsi nəzərdə tutulur. Köçürülən əhalinin işlə təmin olunması üçün zavod və fabriklər inşa edilir. Düşmənin ölü zonaya çevirdiyi Ağdamda hazırda infrastruktur işləri görülür",-  Hacıyev VI Ümumdünya Mədəniyyətlərarası Dialoq Forumu çərçivəsində Ağdamda keçirilən "Minaların və partlamamış hərbi sursatların mədəni mülkiyyətə təsiri" mövzusunda xüsusi sessiyada deyib.

Dövlət Şəhərsalma və Arxitektura Komitəsi yanında Qarabağ Regional Memarlıq və Şəhərsalma Baş İdarəsi Ağdam rayonunun Kəngərli kəndində 292 ədəd yaşayış evinin və 292 ədəd tövlənin tikintisi üçün icazə verib.

Məlumatda göstərilir ki, Dövlət Şəhərsalma və Arxitektura Komitəsi yanında Qarabağ Regional Memarlıq və Şəhərsalma Baş İdarəsi 1 ədəd 5 otaqlı, 60 ədəd 4 otaqlı, 156 ədəd 3 otaqlı, 75 ədəd 2 otaqlı yaşayış evinin və ümumi sahəsi 4 088 kv. metr olacaq 292 ədəd tövlənin tikintisinə 15 mart 2024-cü il tarixli ETİ-09/24 saylı sənəd əsasında icazə verib.

Kəngərli kəndi 1993-cü ildə Ermənistan Silahlı Qüvvələri tərəfindən işğal olunub. 20 noyabr 2020-ci ildə işğaldan azad olunub. 

Aytac