Erkən yaşda nişanlanmanın qarşısını alacaq qanun layihəsi hazırlanıb - Aynur Sofiyeva

Uşaqların erkən yaşda nişanlanmasını qadağan edən qanun layihəsi hazırlanıb. Bunu Ailə Qadın və Uşaq Problemləri üzrə Dövlət Komitəsinin sədr müavini Aynur Sofiyeva  deyib. 
 
"Strategiyada hüquqi bazanın təkminləşdirilməsi ilə bağlı çox vacib sənədlərin hazırlanması öz əksini tapmışdı. Artıq 2 sənəd yekunlaşıb, qəbul olub. Bunlardan biri "Fövqəladə hallarda, pandemiya və bu kimi xüsusi vəziyyətlərdə uşaqların təhsilə, sosial və  digər xidmətlərə çıxışında bərabərliyin təmin edilməsi”, ikincisi isə "Xarici ölkədə çətin həyat şəraitində olan yetkinlik yaşına çatmayanların Azərbaycan vətəndaşların repatriasiyası və reabilitasiyas”dır. Növbəti 3 sənəd son mərhələdədir ki, o da uşaq hüquqları istiqamətində vacib sənədlərdir. Bu il artıq bu da qəbul olacaq.
 
Uşaq hüquqları ilə bağlı qanun layihəsi aidiyyatı qurumlardadır.
 
Bu sənəd layihəsində yeni məsələlər öz əksini tapıb. Uşaqlarla bağlı inzibati və məhkəmə icazələrinə dair ümumi sənədlər müəyyən edilib. Layihədə yeni anlayışlar, erkən evliklə əlaqədar ictimai iaşə obyektlərində mərasimlərin keçirilməsi, sövdələşmə, elçilik, nişan mərasimlərin aparılması, dini kəbinin kəsilmə mərasimlərinin keçirilməsini qadağan edən müddəalar daxil edilib. Eyni zamanda layihədə cismani cəza, bullinq və digər məsələlər ilə bağlı normalar müəyyən edilib. Ümid edirəm ki, yaxın müddətdə bu qanun layihəsi öz təsdiqini tapacaq.
 
Aygün Mirakif
www.anews.az