Azərbaycan təbiətin mühafizəsinə ayrılan xərcləri artırıb

Ətraf mühitin mühafizəsinə və təbii sərvətlərdən səmərəli istifadəyə yönəldilən ümumi xərclərdən, o cümlədən əsas kapitala investisiyalar hesabına 595,0 milyon manat vəsait yönəldilib. Ətraf mühitin mühafizəsi üzrə cari xərclər 56,3 milyon manat, meşələrin, qoruqların, milli parkların saxlanmasına, vəhşi heyvanların və balıqların mühafizəsinə və çoxalmasına 26,1 milyon manat vəsait yönəldilib.

Ətraf mühitin mühafizəsi sahəsində bütün növ əsas fondların alınması, yaradılması və təkrar istehsalına, habelə ətraf mühitin bərpasının digər növlərinə əsaslı vəsait qoyuluşlarını əhatə edən ətraf mühitin mühafizəsinə yönəldilmiş əsas kapitala investisiyalar 2022-ci illə müqayisədə 3,7 dəfə artıb. Bunlardan 93,9%-i su ehtiyatlarının, 6,1%-i atmosfer havasının və torpağın mühafizəsinə yönəldilib.

Ətraf mühitin keyfiyyətinə görə ölkələrin 2022-ci il reytinqində Azərbaycan 1,30 pillə geriləyərək 104-cü yerdə qərarlaşıb. Reytinq hər il Yale Ətraf Mühit Hüququ və Siyasəti Mərkəzi tərəfindən tərtib edilir. Ətraf Mühitin Fəaliyyətinin Tədqiqatı ətraf mühitin sağlamlığı və ekosistemin canlılığı, biomüxtəlifliyin qorunması, iqlim dəyişikliyinin azaldılması, ictimai sağlamlıq, iqtisadi təcrübələr və hökumətin ekoloji siyasətinin müxtəlif aspektlərini əks etdirən 10 kateqoriya üzrə 22 göstərici əsasında ətraf mühit və təbii resursların idarə edilməsi üzrə fəaliyyətini qiymətləndirir .