Xaricdə təhsil alan tələbələrin ilkin siyahısı açıqlanıb

 

Məlumata görə, xaircdə təhsil almağa gedən 295 tələbənin 99 nəfəri reytinqdə ilk onluqda olan ali təhsil müəssisələrində təhsil alacaq.  

 

2024–2025-ci tədris ili üçün sənəd qəbulu Azərbaycan Respublikasının Prezidentinin 28 fevral 2022-ci il tarixli 3163 nömrəli Sərəncamı ilə təsdiq olunmuş "Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2026-cı illər üçün Dövlət Proqramı” əsasında həyata keçirilir.

 

"Xaricdə Təhsil Dövlət Proqramı" çərçivəsində  hər il 400-dək gəncin təhsil alması nəzərdə tutulur. Bunlardan 80-i bakalavr, 320 yer isə magist təhsili üçün ayrılıb.

 

Proqramın şərtlərinə görə, təhsilini bitirdikdən sonra məzunlar ölkəyə qayıdıb  5 il əmək fəaliyyəti ilə məşğul olmalıdır. 

2007-ci ildə bu proqram qəbul ediləndə Azərbaycan Prezidenti İlham Əliyev jurnalistlərə açıqlamasında bildirmişdi ki, "dünyanın aparıcı universitetlərini bitirdikdən sonra məzunlar oxuduqları ölkələrdə qalsalar belə Azərbaycan hökuməti buna etiraz etməyəcək. Çünki ölkənin onu xaricdə təmsil edən güclü diasporaya ehtiyacı var”. 

 

2022-ci ildə  371, 2023-cü ildə isə 381 nəfər adı çəkilən proqram çərçivəsində təqaüd qazanıb. Proqram çərçivəsində təqaüdçülərin təhsilinin maliyyələşməsi Azərbaycanın Respublikası Dövlət Neft Fondunun vəsaitləri hesabına həyata keçirilir. Bu gənclərin xaricdə təhsil almalarına imkan verən sayca ikinci proqramdır. 

Hazırki proqram da Prezident İlham Əliyevin 2022-cü il fevralın 28-də verdiyi sərəncam əsasında fəaliyyət göstərir. 

Gülnar Nazimqızı