Deputatlığa namizədlərin qeydə alınmasının son günüdür

Azərbaycanda dairə seçki komissiyaları sentyabrın 1-nə təyin edilmiş ölkə Milli Məclisinə (parlament) növbədənkənar seçkilərdə namizədlərin qeydə alınması üçün sənədlərin qəbulu bugün 18:00-da başa çatacaq. Bu barədə Mərkəzi Seçki Komissiyasından bildirilib.

Dairə seçki komissiyaları namizədin imza vərəqələri və digər zəruri sənədləri təqdim etdikdən sonra yeddi gün müddətində qeydə alınması barədə qərar qəbul etməlidirlər. Namizədlərin qeydiyyatı prosesi iyulun 13-də başlayıb.

Mərkəzi Seçki Komissiyasının sədri Məzahir Pənahov bildirib ki, artıq dairə seçki komissiyalarında 481 nəfərin namizədliyi rəsmən qeydə alınıb, onlardan 459 nəfərin namizədliyi 25 siyasi partiya tərəfindən irəli sürülüb, qalanları isə özünün namizədliyini irəli sürüb. Ölkədə qeydiyyatdan keçmiş 26 siyasi partiyadan yalnız biri - müxalif Azərbaycan Xalq Cəbhəsi partiyası parlament seçkilərində iştirakdan imtina edib.

Azərbaycan parlamentinə növbədənkənar seçkilər 2024-cü il sentyabrın 1-də keçiriləcək. Azərbaycan Respublikasının Konstitusiyasına görə, bu seçkilər  cari ilin noyabrının birinci həftəsində baş tutmalı idi. Amma ölkənin COP-29-a ev sahibliyi etməsi səbəbindən seçkilərin tarixi dəyişdirilib.
 
 
Milli Məclisin buraxılması və növbədənkənar seçkilərin keçirilməsi təşəbbüsü Milli Məclisin YAP-dan olan deputatlarından gəlib. 
 
Növbədənkənar parlament seçkilərində seçkiqabağı təşviqatın aparılmasına 9 avqustda başlanacaq, 31 avqust saat 8:00-da seçkiqabağı təşviqat dayandırılacaq.
 
Gülnar Nazimqızı