Polad Aslanov ombudsmanın nümayəndələrinə şikayət edib

1 saylı cəzaçəkmə müəssisəsində saxlanılan xeberman.com saytının həbsdə olan rəhbəri Polad Aslanovla avqustun 9-da Azərbaycan Ombudsman Aparatının nümayəndələri görüşü zamanı 2019-cu ildə Dövlət Təhlükəsizliyi Xidmətinin (DTX) əməkdaşları tərəfindən saxlanılması və İstintaq Təcridxanasına gətirildikdən sonra ona qarşı qeyri-insani rəftarla bağlı şikayət edib.  Bu barədə Turan-a jurnalistin həyat yoldaşı Gülmira Aslanova bildirib.

Jurnalist ombudsman nümayəndələrindən yerli məhkəmələrə və daha sonra Avropa İnsan Hüquqları Məhkəməsinə şikayət vermək üçün prokurorluğun qərarlarını almağa kömək etməyi xahiş edib.

Polad Aslanov həmçinin ailəsinin maddi vəziyyəti ilə bağlı  şikayət edib. 

 

"Polad ombudsman nümayəndələrinə bildirib ki, təqsirsiz olduğu halda, altı ildir həbsdə saxlanılır. Onun həbsinin qanunsuz olduğu Avropa İnsan Hüquqları Məhkəməsi tərəfindən də təsdiq edilib. Buna baxmayaraq, onu azadlığa buraxmırlar, dövlət isə ailəsinə sosial yardım göstərmir. Yoldaşım həbsdə olduğuna görə məni - onun həyat yoldaşını işə qəbul etməkdən imtina edirlər. Polad dövlətin öz vətəndaşlarına görə məsuliyyətini xatırladaraq, ailəsinin sosial yardımla təmin edilməsini tələb edib",  - Aslanova qeyd edib.

Onun sözlərinə görə, jurnalist ombudsman Səbinə Əliyevanın adına yazılı ərizədə öz şikayətlərini qeyd edib və ona bu müraciətlərə baxılacağı vəd edilib.

Aslanov  2019-cu il iyunun 12-də həbs olunub və  CM-in 274-cü (dövlətə xəyanət) maddəsi ilə İranın xeyrinə casusluqda ittiham olunub. Məhkəmə onu 16 il azadlıqdan məhrumetmə cəzasına məhkum edilib.