Milli Hidrometeorologiya Xidməti xəbərdarlıq edib

Avqustun 22-23-də respublikanın bəzi bölgələrində isti hava şəraitinin olması proqnozlaşdırılır. İsti hava şəraitində isə bəzi ərazilərdə, əsasən də meşə ərazilərində yanğın olması ehtimalı artır. Bu barədə Milli Hidrometeorologiya Xidmətinin rəisi Nazim Mahmudov bildirib.

 

"Gəncə-Qazax bölgəsində Gəncə, Tovuz, Şəmkir, Tərtərdə yüksək, Ağstafa, Naftalan, Ağdamda isə çox yüksək, Quba-Xaçmaz bölgəsi üzrə Quba, Qusarda yüksək, Şabranda isə çox yüksək, Dağlıq Şirvan bölgəsində İsmayıllı, Qobustanda çox yüksək, Lənkəran-Astara bölgəsində Yardımlı, Astarada isə yüksək yanğın təhlükəsi müəyyən edilib", - o deyib.

Xidmət rəisi bu səbəbdən vətəndaşları təbiətdə, xüsusən sıx meşə və ot örtüyü olan yerlərdə yanğın təhlükəsizlik qaydalarına əməl edilməsində diqqətli olmağa çağırıb.