Ağdam istehsalı ayaqqabılar xaricə ixrac ediləcək

"BAFCO İnvest” MMC 2023-cü ilin əvvəlində Ağdam Sənaye Parkında iştirakçı statusu alıb. Sənaye Parkının 2,5 hektar ərazisində yerləşən zavod xüsusi ucları və altlığı olan təbii dəridən iş ayaqqabıları, xüsusi təyinatlı ayaqqabılar, eləcə də müxtəlif sahələrdə istifadə üçün poliuretan çəkmələr istehsalı ilə məşğuldur.Bunu müsahibəsində ayaqqabı zavodunun istehsal üzrə direktoru Osman Yaylalı deyib.

O bildirib ki, istehsal edilən ayaqqabılar payız-qış, yay-yaz fəsillərinə və təhlükəsizlik xüsusiyyətlərinə görə müxtəlif modellərə bölünür.

İstehsal prosesi və keyfiyyətə nəzarət bu sahədə böyük təcrübəyə malik yüksəkixtisaslı yerli və xarici mütəxəssislər tərəfindən həyata keçirilir. Almaniyanın ən son nəsil avadanlıqları ilə təchiz edilmiş zavodun illik istehsal gücü 510 min cüt ayaqqabıdan ibarətdir.

Beynəlxalq standartlara cavab verən xammallar tanınmış xarici şirkətlərdən sifariş edilir. Ayaqqabı altlıqlarında istifadə olunan poliuretan Almaniyadan gətirilir. Ayaqqabı modellərinin dizaynı və pres qəlibləri dünyaca məşhur brendlərlə işləyən İtaliya şirkəti tərəfindən xüsusi hazırlanıb.