Lənkəran icra başçısına sui-qəsddə ittiham olunan şəxsin məhkəməsi başlayıb

Bakı Ağır Cinayətlər Məhkəməsində hakim Səbuhı Hüseynovun sədrliyi Lənkəran Rayon İcra Hakimiyyətinin başçısı Taleh Qaraşova qarşı sui-qəsd hazırlamaqda ittiham olunan Bəhruz Əsgərovun cinayət işi üzrə hazırlıq iclası keçirilib.

Prosesdə təqsirləndirilən şəxsin anket məlumatları dəqiqləşdirilib. Bəhruz Əsgərov məhkəmədən Dövlət Təhlükəsizliyi Xidmətinin istintaq təcridxanasından Bakı Penitensiar Xidmətinin istintaq təcridxanasına köçürülməsini xahiş edib. Məhkəmə vəsatəti təmin edib.

Məhkəmə prosesi oktyabrın 29-na təyin edilib.

Dövlət Təhlükəsizliyi Xidməti tərəfindən cinayət məsuliyyətinə cəlb edilmiş B. Əsgərova Azərbaycan Respublikasının Cinayət Məcəlləsinin aşağıdakı maddələri ilə ittiham irəli sürülüb: 28,120.2.1, 28,120.2.10, 28,120.2.11, 28,120.2.12 (milli, irqi, dini nifrət və ya düşmənçilik zəminində qrup şəklində təkrarən adam öldürməyə hazırlıq), 28,214.2.1, 28,214.2.3 (atəşli silah və ya silah kimi istifadə edilən əşyalarla terror aktı törətməyə hazırlıq), 28,214-3.1 (terror məqsədilə hazırlıq təliminə cəhd), 28,277 (dövlət və ya ictimai xadimə qarşı sui-qəsd hazırlığı) və 28,278.1 (dövlətin konstitusiya quruluşunu zorla dəyişdirməyə yönəlmiş hazırlıq hərəkətləri).

Həmin şəxs Azərbaycan vətəndaşlarından ibarət qrup yaradıb və onlara Lənkəran İH rəhbərinə qarşı sui-qəsd törətməyi tapşırıb. Terrorçuların digər hədəfi isə İngilis dili müəllimi işləyən xarici vətəndaş olub. Əsgərov bu şəxslər üçün naməlum üçüncü ölkədə döyüş təlimi təşkil etməyi planlaşdırıb. Lakin o, bu planları həyata keçirməyə müvəffəq ola bilməyib.

Kompleks istintaq tədbirləri nəticəsində Bəhruz Əsgərov həbs edilib və cinayət məsuliyyətinə cəlb olunub, məhkəmə qərarı ilə barəsində həbs qətimkan tədbiri seçilib.

N.Təbrizli