Brüsseldə Zəfər Günü qeyd olunub - Foto/Video

Belçikanın paytaxtı Brüssel şəhərində Zəfər Günü və Dövlət Bayrağı Gününə həsr olunmuş təntənəli tədbir keçiriib.

 

Tədbir Fireland Belçika Azərbaycanlıları Birliyi tərəfindən Azərbaycan Respublikasının Belçika Krallığındakı Səfirliyi və Azərbaycan Respublikasının Diasporla İş üzrə Dövlət Komitəsinin dəstəyi ilə təşkil olunub.

Tədbirin ilk hissəsində foto sərgi təşkil edilmişdir. Sərgidə 44 günlük Qarabağ müharibəsindən sonra işğaldan azad edilmiş ərazilərdə ermənilər tərəfindən dağıdılmış, talan edilmiş tarixi abidələrimiz və dini tikililərimiz nümayiş olunmuşdur. Həmçinin zalda Azərbaycan mədəniyyət və incəsənətinə aid guşə də hazırlanıb.

Rəsmi hissəni giriş sözü ilə açan Fireland Belçika Azərbaycanlılar Birliyinin sədri İlahə Tağıyeva qonaqları salamladıqdan sonra tarixi qələbəni  bizlərə yaşadan şəhidlərimizə rəhmət, qazilərimizə isə sağlamlıq arzulayıb.  Daha sonra Tağıyeva 44 günlük müharibə zamanı Belçikada yaşayan azərbaycanlılara göstərdikləri həmrəylik və birlik üçün təşəkkür edib.

Çıxış edən Azərbaycan Respublikasının Belçika Krallığındakı Səfirliyinin 1-ci katibi Tamerlan Babayev bu günün mühümlüyünü bir daha vurğulayıb: "Bu mühüm gün Azərbaycan xalqının mətanət və birliyinin simvoludur. Bugün biz qazilərimizə dərin minnətdarlıq ifadə edir və şəhidlərimizin xatirəsini ehtiramla yad edirik”.

 

Babayev eyni zamanda xaricdə yaşayan həmvətənlərə milli dəyərlərimizin və mədəni irsimizin yaşadılması və təbliği sahəsində göstərdiyi dəstəyə görə təşəkkür edib.

Belçikada fəaliyyət göstərən "Mədəni” platformasının təsisçisi Emin Əliyev də qonaqları salamlayıb. "Bugün burada olmaq, bu xüsusi gündə çıxış etmək çox qürurverici haldır. Hər birinizi bu bayram münasibəti ilə təbrik edirəm” .

Tədbirin musiqili hissəsində Niderlandda yaşayan həmyerlimiz Sadıx Ağamalıyevin ifasında Azərbaycan klassik, retro musiqiləri, həmçinin xalq mahnıları səslənib. Tədbirdə həmçinin Belçikada yaşayan istedadlı gənclər Sabir Mustafayev (gitara) və Mikayıl Babayevin (piano) ifalarında Azərbaycan bəstəkarlarının mahnıları ifa olunub.

 

Fireland uşaq rəqs qrupunun, həmçinin rəqqaslar Nigar Şükürova və Novruz Abdullayevin ifasında rəqs proqramları qonaqların marağına səbəb olub.