Azərbaycanda yeni assosiasiya təsis edilib

Yığıncaqda ASAC-ın rəhbərliyi seçilib. İştirakçıların yekdil qərarlı ilə Bəxtiyar Nəcəfov sədr, Mikayıl Mirzəzadə və Miryusif Cavadzadə isə sədr müavini seçiliblər. Eyni zamanda adıçəkilən şəxslər İdarə Heyətində təmsilçilik hüququ qazanıblar. Pərviz İsmayıllı, Fərid Həsənzadə və Kənan Kərimov isə assosiasiyanın Nəzarət Təftiş Komissiyasının (NTK) üzvləri seçiliblər. Rəhbərliyin rotasiya qaydasında davamlı yenilənməsi qərara alınıb.

Qeyd olunur ki, assosiasiyanın yaradılmasında məqsəd xaricdə təhsil təklif edən şirkətlər arasında faydalı və qarşılıqlı əlaqələrin inkişafına, xaricdə təhsil səviyyəsinin artırılmasına, keyfiyyət, şəffaflıq və peşəkarlığın yüksəldilməsinə nail olmaqdır. Abituriyentlərə və onların valideynlərinə etibarlı və şəffaf təhsil dəstəyi təqdim etməklə yanaşı, xaricdəki təhsil qurumları ilə beynəlxalq protokollara uyğun fəal əməkdaşlıq da qurumun əsas missiyasıdır.

Xaricdə təhsil sahəsində təhsil müəssisələri ilə əməkdaşlıq, sektorda şəffaflığı artırmaq, tələbələr üçün daha əlverişli şərait yaratmaq və xidmət standartlarını yüksəltmək qurumun başlıca prinsiplərindən biridir. Təşkilat fəaliyyətini təkcə bu sahədə inkişafla məhdudlaşdırmır, habelə Azərbaycanın beynəlxalq təhsil bazarında mövqeyinin gücləndirilməsi istiqamətində də fəaliyyət göstərəcək.