Maskın şirkətində Süleyman Kərimovun payı aşkarlanıb

Məlumata görə, Kərimov 2017-ci ildə yaradılan və Delaver ştatında yerləşən Heritage Trust vasitəsilə SpaceX-in səhmlərinə sahib olub. Bloomberg iki keçmiş yüksək vəzifəli ABŞ rəsmisinin sözlərinə istinadən bildirib ki,  trast əvvəlcə SpaceX-in təxminən 1%-nə sahib olub.

ABŞ hökuməti 2018-ci ilin aprelində Süleyman Kərimovn adını sanksiya siyahısına daxil edib. 

 

O, Oliq Deripaska, Viktor Vekselberq və digər rusiyalı milyarderlərlə birlikdə sanksiyalara məruz qalıb.

 

Heritage Trust-ın idarə olunmasını həyata keçirən Citigroup şirkəti bu məsələ ilə bağlı ABŞ Maliyyə Nazirliyinə müraciət edib,  trasta və ona bağlı qurumlara məhdudiyyət qoyulmasına ehtiyac olmadığını bildirib.

Lakin 2022-ci il iyunun sonunda ABŞ Maliyyə Nazirliyinin Xarici Aktivlərə Nəzarət İdarəsi (OFAC) Heritage Trust-ın aktivlərini dondurub. O zaman bu aktivlərin ümumi dəyəri 1 milyard dollar olub.

 

Bloomberg-in iki mənbəsinə görə, həmin dövrə qədər Kərimov SpaceX-dəki payını artıq satıb. 

Citigroup nümayəndəsi bu məsələ ilə bağlı şərh verməkdən imtina edib.

 

SpaceX, Elon Musk və Süleyman Kərimov isə Bloomberg-in sorğularına cavab verməyib.

Hal-hazırda 58 yaşlı Süleyman Kərimov, Bloomberg-in milyarderlər indeksinə əsasən, Rusiyanın ən varlı iş adamları siyahısında 17-ci yerdə qərarlaşıb.

 

Ümumi dünya sıralamasında isə 282-ci yerdədir və sərvəti təxminən 9,9 milyard dollar dəyərindədir. O, 2018-ci ildən ABŞ sanksiyalarına düşüb. Daha sonra Avropa İttifaqı da ona qarşı sanksiyalar tətbiq edib.