Ağsuda güclü sel ekskavatoru aparıb - 1 ölü, 3 yaralı/Yenilənib

Ağsuda selin ekskavatoru aparması nəticəsində ölən şəxs sahə rəisi olub. Bu barədə Azərbaycan Avtomobil Yolları Dövlət Agentliyindən (AAYDA) bildirilib.

Ölən və yaralananlar Muğanlı- İsmayıllı-Qəbələ yolu layihəsində iştirak edən podratçı şirkətin işçiləri olub.

Yerli sakinlərin məlumatına görə, kəskin hava şəraitində, küləkdən qorunmaq üçün işçilər ekskavatora sığınıblar. Bundan sonra gələn sel ekskavatoru aparıb.

14:08

Ağsu rayonunun Kalva kəndində güclü sel axını nəticəsində eks­kavator aşıb, içərisində olan 1 nəfər ölüb, 3 nəfər yaralanıb, yerli media xəbər verir.

Hadisə zamanı yol-təmir işləri görən fəhlələr yağışdan sığınmaq üçün ekskavatora keçiblər, lakin bir müddət sonra əraziyə gələn sel maşını aparıb.

Həlak olan şəxs – 1982-ci il təvəllüdlü Pərviz Ayətullayev hadisə yerində ölüb. Yaralananlar Bəxtiyar Abdullayev (Qazax), Elnur Salahov (Cəbrayıl) və Bəxtiyar Qasımov (Gədəbəy) Fövqəladə Hallar Nazirliyinin xilasediciləri tərəfindən xilas edilərək Şamaxı Mərkəzi Xəstəxanasına təxliyə olunublar.

Hadisə ilə bağlı araşdırma aparılır.

N.Təbrizli