Sabiq məmur həbsdə vəfat edib

Əmək və Əhalinin Sosial Müdafiəsi Nazirliyinin keçmiş vəzifəli şəxsi Rauf Mustafayev cəzaçəkmə müəssisəsində ölüb. Bu barədə “Qafqazinfo” məlumat yayıb.

Hadisə Penitensiar Xidmətin Şəkidə yerləşən Qarışıq Tipli Cəzaçəkmə müəssisəsində qeydə alınıb. Mərhum Bərdə rayon sakini, 38 yaşlı Mustafayev Rauf Abış oğlu həmin müəssisədə cəza çəkirdi.

İlkin ehtimallara görə, Mustafayev anemiyadan əziyyət çəkirmiş.

O, Cinayət Məcəlləsinin 308 və 179.3.2-ci maddələri (vəzifə səlahiyyətlərindən sui-istifadə və külli miqdarda mənimsəmə) ilə təqsirli bilinərək 7 il müddətinə azadlıqdan məhrum edilmişdi. İstintaq zamanı onun elektron sistemə saxta məlumatlar daxil etməklə təxminən 90 min manat vəsaiti mənimsədiyi müəyyən olunmuşdu.