Şamaxıda 10 kiloqram qızıl talayıb bataqlıqda gizlənən dəstə saxlanılıb

Şamaxı şəhərində 10 kiloqramdan artıq qızıl-zinət əşyalarının talandığı quldurluq hadisəsi ilə bağlı üç nəfərdən ibarət dəstə saxlanılıb.

Daxili İşlər Nazirliyindən verilən məlumata görə, naməlum şəxslər şəhər sakininə qarşı fiziki zor tətbiq edərək ona məxsus çantanı – içərisində külli miqdarda qızıl-zinət əşyaları olan əmlakı – talayıb və hadisə yerindən qaçıblar.

Polisin keçirdiyi təxirəsalınmaz əməliyyat tədbirləri nəticəsində cinayətin 23 yaşlı Güloğlan Kərimov, 21 yaşlı Elcan Beydiyev və 18 yaşlı Qafur Baloğlanov tərəfindən törədildiyi müəyyən edilib. Şübhəlilərin hadisə zamanı istifadə etdikləri avtomobilə Hacıqabul rayonunda yerləşən polis postunda “saxla” siqnalı verilsə də, onlar bu göstərişə məhəl qoymayaraq yoluna davam ediblər.

Cinayətkarlar daha sonra izlərini itirmək məqsədilə avtomobili tərk edərək Şirvan şəhərinin bataqlıq ərazisində gizləniblər. Polis onların yerini müəyyən edərək hər üçünü saxlayıb.

Əldə olunmuş qızıl-zinət əşyaları tam həcmdə maddi sübut kimi götürülüb və zərərçəkmiş şəxsə qaytarılıb.

Faktla bağlı cinayət işi başlanılıb, istintaq tədbirləri davam etdirilir.