Prezident Qarabağda bərpa olunan şəhər və kəndlərin sayını açıqlayıb

Indiyədək Qarabağda bərpa olunan şəhər və kəndlərin sayı 15-ə çatıb. Bunu Prezident İlham Əliyev Laçında vətəndaşlarla görüşündə deyib. 

"Bəylik kəndi də ermənilər tərəfindən yerlə-yeksan edilmişdi. İndi gözəl yaşayış məntəqəsi yaradılmışdır. Buna yaxın, sizin qonşu kəndiniz vaxtilə bir kənd olub, Sus kəndi, o tərəfdə Zabux, Laçın şəhər. İndi Laçın rayonunda artıq dörd yaşayış məntəqəsi bərpa edilib. Amma, ümumiyyətlə, bərpa edilmiş şəhər və kəndlərimizin sayı 15-ə çatıb. Bütün bunları qısa müddət ərzində etmişik və işlər davam etdirilir. Azad edilmiş bütün ərazilərdə genişmiqyaslı işlər gedir ki, tezliklə bizim vətəndaşlarımız öz torpaqlarına qayıtsınlar", - Prezident deyib. 

2025-ci ilin Qarabağın bərpasına 4 milyard manat ayrılması nəzərdə tutulur ki, bu da cari ildən 1 milyard manat çoxdur. 

2020-ci ildən bu günə qədər Qarabağın bərpa olunması və yenidənqurulmasına 17,5 milyard manata yaxın vəsait ayrılıb. 
 
2024-cü ildə Azərbaycanın azad olunmuş ərazilərinin bərpası üçün 3 milyrd ABŞ dolları məbləğində maliyyə vəsaiti ayırılıb.
 
BMT-nin hesablamalarına görə, işğal nəticəsində Azərbaycana dəymiş iqtisadi zərərin həcmi 53.5 milyard ABŞ dolları həcmindədir.
 

Gülnar Nazimqızı