Rüfət Səfərovun məhkəməsi başlayıb – vəsatət rədd edilib

30 iyun tarixində Bakı Ağır Cinayətlər Məhkəməsində hüquq müdafiəçisi Rüfət Səfərovun işi üzrə hazırlıq iclası keçirilib.

Prosesə hakim Aygün Qurbanova sədrlik edib.

Məhkəmə zamanı vəkil Elçin Sadıqovun müvəkkilinin yanında əyləşməsi ilə bağlı vəsatəti təmin olunub.

Səfərov çıxışında özünü “siyasi məhbus” adlandırıb və hüquq müdafiə fəaliyyəti səbəbilə həbs olunduğunu bildirib.

“ "Hüquq müdafiəçi kimi hüquqları pozulan, inzibati və cinayət həbs olunanların işini monitorinq edib, yerli və beynəlxalq ictimaiyyətin nəzərinə çatdırırdım. Məni isə xuliqan və dələduz kimi həbs ediblər. Öz çıxışlarımda təhqirdən istifadə etmədiyim halda məni vurmaq üçün Parkinson xəstəliyi olan atamın səsini yaydılar,” – deyə Səfərov bildirib.

O, siyasi iddiası olmadığını, fəaliyyətinin ictimai əsaslarla həyata keçirildiyini vurğulayıb.

Vəkil Rüfət Səfərovun ev dustaqlığına buraxılması ilə bağlı vəsatət verib, lakin məhkəmə bu vəsatəti təmin etməyib. Növbəti məhkəmə iclası 14 iyula təyin olunub.

Rüfət Səfərov 2023-cü il dekabrın 3-də saxlanılıb. Ona qarşı Cinayət Məcəlləsinin 221.1 (xuliqanlıq), 127.2.3 (qəsdən sağlamlığa az ağır zərər vurma) və 178.3.2 (külli miqdarda ziyanla dələduzluq) maddələri ilə ittiham irəli sürülüb. Səfərov özünü təqsirli bilmir.

Tatyana Kryuçkina