Yüksəkrütbəli rəsmilər sərhəd zonasında hərbçilərlə görüşdü, fərqlənənlər mükafatlandırıldı

Azərbaycan Respublikasının Baş prokurorunun müavini, Hərbi prokuror ədliyyə polkovniki Bəhruz Əhmədov və müdafiə nazirinin müavini – Quru Qoşunların komandanı general-polkovnik Hikmət Mirzəyev dövlət sərhədlərində xidmət edən hərbi qulluqçularla görüşüblər. Bu barədə Hərbi Prokurorluqdan bildirilib.

Hərbi Prokurorluğun məlumatına əsasən, müxtəlif hərbi hissələrdə keçirilən görüşlərə Hərbi Prokurorluğun və Müdafiə Nazirliyinin rəhbər heyəti qatılıb. 

Tədbir Ümummilli Lider Heydər Əliyevin və şəhidlərin xatirəsinin bir dəqiqəlik sükutla yad edilməsi və Dövlət Himninin səsləndirilməsi ilə başlayıb. 

Baş Prokurorluğun rəhbərliyinin təbriki şəxsi heyətə çatdırılıb.

Rəsmi şəxslər çıxışlarında Prezident, Ali Baş Komandan İlham Əliyevin rəhbərliyi ilə ölkənin hərbi sahədə əldə etdiyi nailiyyətlər və Silahlı Qüvvələrin inkişafı barədə fikirlər səsləndiriblər.

Görüş zamanı hərbi qulluqçular üçün hüquqi maarifləndirmə aparılıb, onları maraqlandıran suallar cavablandırılıb.

 Eyni zamanda, şəxsi heyətin xidmət və məişət şəraiti, qarşılaşdıqları çətinliklər dinlənilib.

Tədbirin sonunda xidmətdə fərqlənən hərbi qulluqçulara hədiyyələr təqdim olunub.