Azərbaycan hökuməti çoxuşaqlı ailələrə dəstəyi artırır

Azərbaycanda çoxuşaqlı ailələrdə hər uşağa görə verilən aylıq sosial müavinət iyulun 1-dən etibarən 33 faiz artırılaraq 105 manatdan 140 manata çatdırılıb. Bu barədə Milli Məclisin deputatı Vüqar Bayramov sosial media hesabında məlumat verib.

Artım, Prezidentin imzaladığı fərman əsasında qüvvəyə minib.

Mövcud qanunvericiliyə əsasən, bu müavinət beş və daha çox uşaq dünyaya gətirib tərbiyə edən qadınlara, uşaqların sağ olması şərti ilə, uşaqlardan biri bir yaşına çatdıqdan sonra təyin edilir və 18 yaşına qədər ödənilir.

Vətəndaşlar müavinət üçün Dövlət Sosial Müdafiə Fondunun yerli strukturlarına, DOST mərkəzlərinə və ya müvafiq əlaqələndirmə mərkəzlərinə müraciət edə bilərlər.

Müraciətlərə ən geci 10 gün ərzində baxılır, imtina hallarında isə səbəblər 5 gün ərzində bildirilməlidir.

Bayramov əlavə edib ki, geriyə dönük ödəniş imkanı da mövcuddur – vətəndaşlar müraciət etdiyi tarixdən əvvəlki 3 il üçün müavinət ala bilərlər.

Parlamentdə çoxuşaqlı ailə anlayışına yenidən baxılması və bu statusun beş yox, üç uşaqla müəyyən olunması təklifi də müzakirə mövzusudur.

Gülnar